2000-shy jyldardyń basynda Shyńjańdaǵy qazaq gazetiniń shaqyrýymen «egemendik» bir top jýrnalıst Aspanasty elinde aptadan artyq bolǵan. Dúnıejúzindegi júzim tuqymynyń bári ósiriletin Turfan qalasynyń eski ornynda bolǵanymyzda týrısterdiń kóptigine qatty tańyrqaǵan edik. Eýropanyń seksen jastan asqan qarııalary bir-birin súıemeldep konservasııaǵa alynǵan qalashyqty aralap júrgenderi jáne súısindirdi. Olar Las-Vegas sııaqty jarq-jurq qalalardyń qyzýyna ábden toıǵan. Jıǵan-tergenin týrızmge salatyn olardy ejelgi qala oryndary erekshe qyzyqtyrady eken.
Týrızm – úlken qarjy, memleket baılyǵy. Búginde munaıly Arab Ámirlikterinen bólek, Ispanııa sııaqty jalań-jutań memleketterdi asyrap otyrǵan osy týrızm. Jerasty baılyǵy sarqylýy múmkin, al týrızm taýsylmaıtyn qazyna.
Ishki týrızm bizdiń elde de qarqyndy bolmasa da damyp keledi. Ony «Ońtústik» aqparat ortalyǵynda ótken brıfıngte Túrkistan qalasynyń ákimi Álipbek О́serbaev naqty mysaldarmen aıtyp berdi. Kúlli túrki dúnıesi úshin qasterli mekenge sońǵy úsh jylda 2 mln.-ǵa jýyq týrıst kelgen. Máselen, 2013 jyly 700 myńdaı týrıst kelse, 2014 jyly sany 1 mln.-ǵa jýyqtaǵan. Al, bıylǵy jyldyń alty aıynda 594,8 myń týrıst Túrkistanǵa arnaıy kelipti. Sopylyq ilimniń negizin qalaǵan Qoja Ahmet Iаsaýı kesenesinde kıiz týyldyryqty qazaqty el qylǵan, ulan-ǵaıyr jeriniń shetine jaý aıaǵyn bastyrmaǵan, azattyqty ańsap ótken han, bı, batyrlarymyzdyń deni máńgige damyldap jatyr. Búginde ataǵy alysqa ketken Qazaqstandy kóremin, ótkenimen tanysamyn degenge munda kári tarıh kóp jaıtty baıandap beredi. Qala týrızm máselesin myqtap qolǵa alyp, sońǵy jyldardyń ózinde ondaǵan nysandardy iske qosty. Týrısterdiń kóbeıýiniń úlken sebebi osynda jatqan sııaqty.
Baqtııar TAIJAN, «Egemen Qazaqstan».
Ońtústik Qazaqstan oblysy.