Qazaqstan Qarýly Kúshteriniń áskerı meteorologtary boljaý men gıdrometeorologııalyq qamtamasyz etý júıesin jańa deńgeıge kóterip jatyr. Talǵat Bıgeldınov atyndaǵy Áýe qorǵanysy kúshteri áskerı ınstıtýtynda jáne «Aıbyn» áýeaılaǵynda ótken jattyǵýlarda mamandar zamanaýı tehnıkamen jumys isteý sheberlikterin jetildirdi, dep habarlaıdy Egemen.kz.
QR Qarýly Kúshteri Bas shtabynyń Geoaqparattyq qamtamasyz etý departamentiniń bastyǵy polkovnık Serik Joldybaevtyń aıtýynsha, meteorologııalyq qyzmettiń sapasy ushaqtardyń kóterilýinen bastap, teńizdegi kemelerdiń qozǵalysy men zymyran ushyrýdyń qaýipsizdigine deıin tikeleı áser etedi.
Áskerı mamandar tek aýa raıyn boljaýmen shektelmeıdi. Olar «Qazgıdromet» qyzmetimen birlese jumys istep, sý tasqyny men daýyl sııaqty tótenshe jaǵdaılardyń aldyn alýǵa qatysady. Osyndaı ózara is-qımyldyń arqasynda ásker tabıǵı tosyn jaǵdaılarǵa barynsha daıyn bolady.
«Zamanaýı tehnıkany praktıkalyq qoldanýǵa erekshe nazar aýdarylýda. Áskerıler PMS-70 jyljymaly meteostansııasyn ornalastyrý tártibin jáne Fınlıandııada shyǵarylǵan CL31 lazerlik bult ólshegishin qoldanýdy pysyqtady. Bul qurylǵy bultty úzdiksiz baqylaýǵa arnalǵan jáne kez kelgen aýa-raıynda táýlik boıy jumys isteı alady, barynsha dál ólsheýdi jáne avtomattandyrylǵan ushýdy basqarý júıelerine derekterdi berýdi qamtamasyz etedi», dep habarlady Qorǵanys mınıstrliginiń baspasóz qyzmeti.
Bul baǵyttaǵy jetildirýler eldiń qorǵanys qabiletin nyǵaıtyp, jaýyngerlik tapsyrmalardyń dáldigi men qaýipsizdigin jańa deńgeıge kótermek.