Júris – adamnyń tirek-qımyl júıesiniń kórsetkishi, densaýlyǵynyń aınasy. Alaıda biz kúndelikti ómirde qalaı qadam basyp júrgenimizge mán bere bermeımiz. Aıaq aýyryp, bel shanshyǵanda ǵana máseleni baıqaımyz. Osyndaı problemanyń aldyn alý úshin otandyq mamandar aqyldy ultaraq oılap tapty.
Qurylǵy adamnyń árbir qadamyn baqylap, dene salmaǵyn, júristegi aýytqýlaryn anyqtap beredi. Jobany «ISSAI» quramyndaǵy jetildirilgen robottehnıka jáne mehatronıka júıeleri laboratorııasy júzege asyryp otyr.
Laboratorııa meńgerýshisi Azamat Eshmuhametovtiń aıtýynsha, qurylǵynyń negizi – jasandy ıntellekt pen nanosensorlar. Ultaraqtyń ishine ornatylǵan joǵary dáldiktegi sensorlar adamnyń qozǵalysyn baqylap, naqty málimetterdi kompıýterge jiberedi. Al júıe bul derekterdi taldap, ekran arqyly kórsetedi. «Bizdiń jobamyz – qarapaıym ultaraq emes, ol naqty dıagnoz qoıa alatyn qurylǵy. Adam júrgen kezde qaı tusqa salmaq túsirip jatyr, qozǵalys sımmetrııaly ma, joq pa bárin birden kórýge bolady. Biz munda óte sezimtal nanosensorlardy paıdalanamyz. Olardyń kómegimen júristiń dáldigi men salmaqtyń taralýyn anyqtaımyz», deıdi zertteýshi.
Qurylǵyny medısına salasynda qoldaný óte tıimdi bolmaq. Qazirdiń ózinde birneshe klınıkada qanatqaqty joba retinde paıdalanylyp jatyr. Mamandar naýqastardyń tabanyna ultaraqty salyp, eki mınýt ishinde júrisindegi aýytqýlardy anyqtaı alady. «Keıbir adamdar syrttaı qaraǵanda durys júretindeı kórinedi. Biraq ultaraqty salyp, naqty kórsetkishti kórgende, salmaqty tek ókshesine nemese bir jaq tizesine ǵana túsirip júrgeni anyqtalady. Mundaı qate júris ýaqyt óte kele býyndarǵa, omyrtqaǵa, aıaqqa salmaq túsiredi. Biz buny erte anyqtap, adamdarǵa «salmaǵyńyzdy oń aıaqqa teńdeı túsirińiz, fazalyq qozǵalysty ózgertińiz» degen sııaqty keńes beremiz. Munyń bárin jasandy ıntellekt taldap beredi», deıdi Azamat Eshmuhametov.
Ultaraq dıagnoz qoıyp qana qoımaıdy. Ol ońaltý barysyn da baqylap otyrady. «Biz adamnyń densaýlyǵyndaǵy ózgeristi dál kórsetemiz. Naýqastar apta saıyn ózgeristerdi ózderi kórip, qarap otyrady. Bul ońalýǵa degen senimdi arttyrady», deıdi zerthana meńgerýshisi.
Injenerler bolashaqta qurylǵyny sportshylarǵa, áskerı qyzmetkerlerge, aýyr dene eńbegimen aınalysatyn jumysshylarǵa beıimdeýdi kózdep otyr. Sebebi durys júris – tek qozǵalys máselesi emes, adamnyń jalpy densaýlyǵyna áser etetin mańyzdy faktor.