Búgin Májiliste tarıhı-mádenı mura obektilerin saqtaý jáne paıdalaný máselelerin qamtıtyn zań jobasy qaralyp, birinshi oqylymda maquldandy. Qujat Memleket basshysynyń Ulttyq Quryltaıda bergen arheologııalyq qyzmetti retteý jónindegi tapsyrmasyn júzege asyrý maqsatynda depýtattardyń bastamasymen daıyndalǵan, dep habarlaıdy Egemen.kz.
«Zań jobasynyń maqsaty – arheologııa salasyndaǵy tarıhı-mádenı mura nysandaryn qorǵaý jáne paıdalaný máseleleri boıynsha zańnamany jetildirý. Qujatta arheologııalyq jumystar barysynda anyqtalǵan tarıhı-mádenı mura obektileri týraly barlyq málimetti jınaqtaý úshin «Arheologııalyq jumystar jónindegi biryńǵaı avtomattandyrylǵan aqparattyq júıe» qurý qarastyrylǵan», dep habarlady QR Parlamenti Májilisiniń baspasóz qyzmeti.
Sonymen qatar, arheologııalyq zertteýlerdi ǵylymı jáne aqparattyq turǵyda qoldaý úshin Á.H.Marǵulan atyndaǵy Arheologııa ınstıtýtyn úılestiretin «Ulttyq arheologııalyq qyzmettiń» quzyretterin aıqyndaý usynylady.
«Ǵylymı-restavrasııalyq jáne arheologııalyq jumystarǵa 5 jyldyq merzimge lısenzııa berýdi bólý arqyly arheologııalyq jumystarǵa lısenzııa berý júıesine ózgerister engiziledi. Sondaı-aq qarjylandyrý tetigin eskere otyryp, arheologııalyq jumystar josparly jáne profılaktıkalyq (jospardan tys) bolyp ekige bólinedi. Qazaqstannyń barlyq aýmaǵynan jınalǵan jappaı arheologııalyq oljalar men materıaldardy saqtaý úshin jappaı Arheologııalyq oljalar men materıaldardyń ulttyq depozıtarııi qurylady», delingen habarlamada.
Qujatta arheologııalyq jumystar nátıjesinde buzylǵan jer ýchaskeleri men basqa da tabıǵı obektilerdi mindetti túrde qalpyna keltirý erejeleri naqtylanady. Budan bólek, arheologııalyq izdestirý kezinde metall detektorlar, radarlar men magnıttik qurylǵylardy zańsyz qoldanýǵa tyıym salynady.
Sonymen qatar tarıhı jáne mádenı mańyzy bar jerler men olardyń qorǵalatyn aımaqtary memlekettik jer kadastryna engiziletin bolady.