Munaıly óńirdiń áleýmettik-sporttyq ınfraqurylymyn jańa deńgeıge kóterý maqsatynda 2021–2025 jyldar aralyǵynda 36 sport kesheni men 25 vorkaýd jattyǵý alańyn salý josparlanyp otyr. Bıyl Maqat, Qyzylqoǵa, Isataı, Mahambet, Inder aýdandarynda sport keshenderi paıdalanýǵa beriledi.
Atyraý oblysynyń ákimi Serik Shápkenovtiń aıtýynsha, buqaralyq sportty damytýǵa memleket qana emes, iri bıznes ókilderi de kóńil aýdaryp otyr. Máselen, «Texol» sekildi iri kompanııalar óndiristik jobalardy iske qosýmen ǵana shektelip qalmaı, áleýmettik ınfraqurylymdy damytýǵa eleýli úles qosýdy qolǵa aldy. Kompanııa «Texol Wellness Atyrau» sporttyq-saýyqtyrý kesheniniń qurylysyna demeýshilik tanytyp otyr.
«О́ńirde eń iri sport-saýyqtyrý kesheniniń qurylysy bastaldy. Bul – bıznestiń áleýmettik jaýapkershiliginiń naqty kórinisi. Kompanııa buǵan deıin Atyraý vagon qurastyrý zaýyty jobasyn sátti júzege asyrdy. Endi, mine, sporttyń 12 túrimen aınalysýǵa múmkindik beretin zamanaýı keshen salýǵa kiristi. Munda eresekter de, balalar da jattyǵa alady. Bul – salamatty ári belsendi qoǵam qurý jolyndaǵy taǵy bir qadam», deıdi S.Shápkenov.
«Texol group» dırektorlar keńesiniń tóraǵasy Shota Abhazavanyń aıtýynsha, zamanaýı sport, demalys ortalyǵynyń jalpy aýdany – 18 myń sharshy metr. Úsh qabatty keshende tennıs korttary, alty jolaqty júzý basseıni, fıtnes, jattyǵý zaldary, órmeleý qabyrǵasy men demalys aýmaǵy qarastyrylyp otyr. Nysan bir mezgilde bir myń adamdy qabyldaı alady.
Jaqynda Qyzylqoǵa aýdanyndaǵy Jambyl aýyldyq okrýginde deneshynyqtyrý-saýyqtyrý kesheni ashyldy. Aýdan ákimi Qanat Ázmuhanovtyń málimetinshe, keshenniń qurylysy 2024 jyly bastalǵan. Jańa nysannyń qurylysyn «AtyraýQurylysStandart» JShS júrgizgen.
«Prezıdent tapsyrmasyna sáıkes sport salasyn damytý baǵytynda aýdanymyzda aýqymdy jumys atqarylyp jatyr. Buryn Mııaly men Saǵyz aýyldarynda sport kesheni bar edi. Keıingi jyldary Tasshaǵyl men Jasqaırat aýylynda jańa nysandar ashyldy. Jyl sońyna deıin Qarakól, Qonystaný, Qarabaý aýyldarynda sport keshenderi paıdalanýǵa beriledi. Kelesi jyly Jangeldın, Taısoıǵan aýyldarynda sport mektepterin ashý josparlanyp otyr», deıdi Q.Ázmuhanov.
Zamanaýı nysanda sport zaly, jattyǵý, kúres bólmeleri, kıim aýystyratyn oryndar men jattyqtyrýshylar kabınetteri bar. Aýdannyń bilim salasynda 40 jyldan astam jumys istegen ardager ustaz Rahmet Ǵalııahmetovtiń aıtýynsha, mundaı keshen jas býyndy sportty serik etýge, salamatty ómir saltyna baýlýǵa yqpal etedi.
«Bizdiń kezimizde mundaı keń zaly bar sport keshenderi bolmady. Bul – memlekettiń buqaralyq sportty damytýǵa bet burýynyń jemisi», deıdi R.Ǵalııahmetov.
Qazir osy aýdandaǵy Muqyr aýylynda sport kesheni salynyp jatyr. Nysannyń aýmaǵy 2351 sharshy metrdi quraıdy. Keshende fýtbol, voleıbol, basketbol, kúres zaldary qarastyrylǵan. Sondaı-aq zamanaýı talapqa saı jabdyqtalǵan jattyǵý zaly, 87 sharshy metrlik ashana men 20 oryndyq jataqhana da sportshylar ıgiligine beriledi.
Oblystyq deneshynyqtyrý, sport jáne týrızm basqarmasynyń basshysy Nurbol Sydyqovtyń deregine súıensek, osyndaı jańa sport kesheni Mahambet aýdanynyń Tańdaı aýylynda da ashyldy. Bul aýylda buqaralyq sportpen qamtylatyn bala sany 400-ge jýyqtaıdy. Keshen 150 adamǵa arnalǵan. Eki jyl buryn qurylysy bastalǵan nysannyń jalpy aýdany – 2077,12 sharshy metr. Keshen jobasyn «Sý qurylys Joba» JShS, qurylys jumysyn «Suńqar Qurylys LTD» JShS júrgizdi. «Grand Ýrban» JShS tehnıkalyq qadaǵalaýdy iske asyrdy.
Jańa keshende oıyn, jattyǵý zaldary, erler men áıelderdiń kıim aýystyrý bólmeleri, jýynýǵa arnalǵan, medısınalyq kabınetter bar. Endi munda fýtbol, voleıbol, basketbol, boks, dzıýdo, qazaq kúresi, toǵyzqumalaq, grek-rım kúresiniń seksııalary jumys isteıdi.
«Prezıdenttiń tapsyrmasyna sáıkes aldaǵy ýaqytta ulttyq sport pen olımpıadalyq sport túrlerin damytýǵa basymdyq beriledi. Ásirese aýyldaǵy balalar men jasóspirimder bos ýaqytyn tıimdi ótkizip, sportqa qadam basady», deıdi N.Sydyqov.
Onyń aıtýynsha, Atyraýdaǵy taǵy bir mańyzdy sport nysany – oqý-jattyǵý ortalyǵynyń qurylysy qaıta jandandy. Buryn bul nysannyń qurylysy sot daýlaryna baılanysty toqtap qalǵan edi. Qurylys jumysyn «VEK-Stroy-Com» JShS júrgizip jatyr. Jobada úsh zamanaýı sport zaly men qajetti ınfraqurylym qarastyrylǵan.
«Olımpıadalyq sport túrlerine arnalǵan baza oqý-jattyǵý ortalyǵynyń qurylysyn jyl sońyna deıin aıaqtaý kózdelip otyr. Bul nysan olımpıadalyq sport túrleri boıynsha oblystyq qurama komandalardyń daıyndyq bazasyna aınalady. Munda kúnine 200-den astam sportshy turaqty túrde jattyǵa alady», dep málimdedi N.Sydyqov.
Basqarma basshysynyń aıtýynsha, bıyl úsh iri sport nysany – deneshynyqtyrý-saýyqtyrý kesheni, muz aıdyny men «Atyraý» oblystyq fýtbol komandasy» JShS senimgerlik basqarýdan memleket menshigine qaıtaryldy. Bul qadam sport nysandaryn turǵyndar ıgiligine tıimdi paıdalaný maqsatynda jasalyp otyr. Sondaı-aq birneshe zamanaýı nysannyń qurylysyn júrgizý josparlanǵan. Onyń ishinde «Atyraý Arena» sport kesheni, ulttyq sport túrlerine arnalǵan, baıdarka men kanoe esý ortalyqtary, 12 myń oryndyq fýtbol stadıony sekildi nysandar bar.
Sondaı nysannyń biri – daryndy balalarǵa arnalǵan sport-ınternaty. Osy maqsatta Atyraý qalasynan bólingen 4,2 gektardy quraıtyn jer telimine 400 oryndyq mektep-ınternat ǵımaratyn salý kózdelip otyr. Jobaǵa sáıkes qurylys jumysyn 2027 jyly aıaqtap, qoldanysqa berý josparlanǵan. Bul nysan bolashaq chempıondardy daıarlaýǵa arnalǵan zamanaýı ınfraqurylymmen qamtamasyz etiledi.
«Keshen óńirdegi sporttyq bilim júıesin jańa deńgeıge kóteredi. Sporttaǵy daryndy jastarǵa qolaıly jaǵdaı jasaýǵa múmkindik beredi. Bıyl alǵash ret 18 sport mekemesine jańa avtobýs berildi. Maqsat – sportpen shuǵyldanatyn balalar men jasóspirimderdiń jattyǵýǵa, jarys oryndaryna qaýipsiz qatynaýyn qamtamasyz etý. Jańa avtobýstar oblystaǵy sport uıymdarynyń materıaldyq-tehnıkalyq bazasyn nyǵaıtyp qana qoımaı, jas sportshylardyń ýaqtyly ári qaýipsiz tasymalyn qamtamasyz etedi», deıdi basqarma basshysy.
Atyraý oblysy