Elaralyq joldyń sapasy jaqsardy

Osy bóliktegi ortasha jóndeý jumystaryna 2,3 mlrd teńge memleket qarjysy jum­saldy. «Qazavtojol» ulttyq kom­panııasy Aqtóbe oblystyq fılıaly dırektorynyń orynbasary Rınat Orazǵalıevtiń aıtýynsha, ekinshi sanattaǵy «Aqtóbe–Mártók» tasjolyna 2013 jyly qaıta jaraqtandyrý júrgizilgennen beri onyń sapasyna shaǵym bolǵan joq. Joldyń sapaly bolǵanyna qaramastan, bıylǵy jyly buzyla bastaǵan 34 shaqyrymyn eki tusynan qaıta jóndeýge sheshim qabyldandy. Onyń birinshi bóligi Qa­zaqstan–Reseı shekarasyndaǵy «Jaısań» ótkizý beketine deıingi 4 shaqyrym jol. Osy tusqa eki qabatty asfalt-beton jamylǵy tóseldi. Al tasjoldyń 54–84 shaqyrymy aralyǵynda, ıaǵnı Keńsahara men Voznesenovka aýyldary tusyndaǵy tasjoldyń betki qabaty qyrylyp alynyp, qıyrshyq tas tóselip, asfaltti-betondy qospamen qaıta bekitildi. Tas­joldyń eni keńeıtilgen joq.

«Reseıdiń Orynbor oblysy baǵytyna qaraı «Aqtóbe–Mártók» tasjolynyń boıymen táýligine júretin 7 myń kóliktiń 1 800-i aýyr júk kólikteri. Elimizdegi kólik qozǵalysyn retteıtin sońǵy zańnamadaǵy ózgerister boıynsha respýblıkalyq mańyzy bar tas­joldardyń keıbir bólikterinde aýyr júk kólikterinen tólemaqy talap etiledi. Máselen, Aqtóbe oblysy aýmaǵynda «Aq­tóbe–Mártók» tasjoly men «Aq­tó­be–Atyraý» avtokólik jolynyń «Qan­dy­aǵash–Maqat» aralyǵynan salmaǵy aýyr kólikter tegin júre almaıdy. Osy joldardaǵy tólemaqy aýyr júk kólik­teriniń salmaǵy men avto­býstardyń sy­ıym­dylyǵyna baılanys­ty. Máselen, salmaǵy 2,5 tonnalyq aýyr júk kóligi men 16 oryndyq avtobýs úshin 17–60 shaqyrym aralyǵyna 310 teńge bekitilgen. Júrgizýshi jolǵa shyqpastan buryn aldyn ala tólem júrgizgen jaǵdaıda ­onyń baǵasy 270 teńgege tómen. Kólikaqy ­qys­ta joldardy kútip ustaýǵa, jańa ­teh­nıkalar satyp alýǵa jumsalady», deıdi Rınat Orazǵalıev.

Jol aktıvteri sapasy Ulttyq orta­lyǵy Aqtóbe fılıalynyń ınjeneri Nurdáýlet Túmenovtiń aıtýynsha, jón­deý jumystary kezinde joldyń 53 jerinen synamalar alyp, materıaldar sapasy tekserilgen. «Bizdiń fılıal mamandary jolǵa tóseıtin asfalt quramyn, qıyrshyq tas, bıtým sapasyn tekserip qana qoımaı, betki qabattarynyń tegistigin, kólbeýligin de baqylap turdy. Sapasyz tustary anyqtalǵanda eskertý jasadyq. Birden qaıta túzetildi. 100 shaqyrymnan asatyn «Aqtóbe–Mártók» tasjoly 2013 jyly salynǵaly beri jóndeý kórmese de,  osy kezge deıin shydas berip keldi. Asa qatty búlinýler de baıqalmaıdy.

Aqtóbe oblysynda jańadan salyn­ǵan jol sapasyz bolyp jatsa, oǵan merdi­ger tikeleı jaýapty. Sapasyz, arzan mate­rıaldardy tósegendikten jóndelgen jol bólikteri tez buzylady. Kólik qatynasy óte tyǵyz respýblıkalyq mańyzy bar tasjoldardy jóndeý kezinde sapaly bıtýmdardy paıdalaný kerek. Osy jyly apatty jaǵdaılar kóp bolatyn, kólik júrgizýshileriniń narazylyǵyn týǵy­zyp júrgen «Aqtóbe – Hromtaý» tasjoly­nyń 28 shaqyrymy keńeıtilip, qaıta salynyp jatyr. Jol aktıvteri sapasy Ulttyq ortalyǵy fılıalynyń mamandary osy bóliktegi jóndeý jumysta­ryn baqylaýda ustap otyr», deıdi Nurdáý­let Túmenov.

Aqtóbe oblysy