Memleket basshysy Qasym-Jomart Toqaevtyń tapsyrmasymen qolǵa alynǵan «Keleshek mektepteri» jobasy aıasynda Jambyl oblysynda buǵan deıin tórt mekteptiń irgesi qalansa, Respýblıka kúni merekesi aıasynda Qordaı aýdanynda taǵy eki bilim uıasy shákirtterge esigin aıqara ashty. Zamanaýı jabdyqtarmen qamtylǵan jańa mektepter ýaqyt suranysyna saı boı kótergen.
Qordaı aýdanyna qarasty Qarasý jáne Qarakemer aýyldarynda qonystanǵan jergilikti halyqtyń armany oryndaldy. Endi munda zaman talabyna saı bilim beretin sý jańa bilim ordasy bar. Jańadan salynǵan bilim oshaqtarynyń ashylý saltanatyna qatysqan óńir basshysy Erbol Qarashókeev óńirdiń bilim salasyn órkendetýge, Prezıdent Qasym-Jomart Toqaevtyń tapsyrmasyn oblys aýmaǵynda júıeli túrde júzege asyrýǵa barynsha den qoıylǵanyn atap ótti. Sondaı-aq aǵartýshy salaǵa jergilikti atqarýshy bılik tarapynan jan-jaqty qoldaý kórsetý jumysy ármen qaraı da jalǵasatynyn tilge tıek etti.
«О́ńirde keıingi ýaqytta bilim salasynyń jumysyn jandandyrý maqsatynda zaman kóshine saı bilim oshaqtary boı kóterip jatqanyn jergilikti jurt kórip, bilip otyr. Mektep salý – bul tek ǵımarat salý emes, eldiń bolashaǵyn, jas órkenniń erteńin qalyptastyrý. О́ıtkeni árbir bilim uıasy – bala armanynyń jańa taraýy, ulttyń rýhanı qaınary, memlekettiń berik tiregi. Bul – óskeleń urpaqqa degen qamqorlyqtyń, el erteńine degen jaýapkershiliktiń aıqyn kórinisi. Sondyqtan da aǵartýshy salaǵa degen qamqorlyq eshqashan tolastamaq emes.
Memleket basshysy Qasym-Jomart Toqaevtyń «Búgin sanaly urpaq tárbıeleı alsaq, erteń zaman kóshiniń basynda júremiz» degeni bárimizdiń jadymyzda jańǵyryp turǵany sózsiz. Bul sóz – bilim salasynyń basty ustanymy, árbir ustazdyń júregindegi senim men jaýapkershiliktiń nyshany. Muǵalim muny qaperden shyǵarmaǵany jón.
Bilim – ulttyń júregi, mektep – onyń búlkildep soqqan tamyry. Qarasý aýylynda esigin aıqara ashqan jańa bilim ordasy – sol júrektiń jańasha soǵýy, el úmitin aqtar bolashaqtyń bastaýy bolsyn. Ustazdarǵa jemisti eńbek pen tolaıym tabys tileımin. Jańa mektep jańashyldyqtyń ordasyna aınalsyn», dedi Erbol Qarashókeev qarasýlyqtardy jańa bilim oshaǵynyń ashylýymen quttyqtap.
Prezıdent tapsyrmasyna sáıkes «Keleshek mektepteri» ulttyq jobasy aıasynda boı kótergen jańa bilim oshaqtarynda oqýshylardyń sapaly bilim alýyna barlyq jaǵdaı qarastyrylǵan. Eki mektep te 300 bilim alýshyǵa arnalyp salynǵan.
Qarasý eldi mekenindegi №53 bilim ordasynda 28 oqý kabıneti, 80 oryndyq májilis zaly, ashana, kitaphana (30 oryndyq oqý zaly bar), 667 sharshy metr aýmaqty qamtıtyn sportzal bar. Budan bólek STEM, robottehnıka jáne kompıýter synyptary qarastyrylǵan eken. Sondaı-aq bilim alýshylardyń zeıinin damytýǵa arnalǵan kovorkıng ortalyǵy, 3 sheberhana men 3 ǵylymı zerthana da jumys isteıdi. Bir sózben aıtqanda, oqýshylardyń ýaqyt kóshinen qalmaı, jan-jaqty damýyna barlyq jaǵdaı qarastyrylyp otyr.
Jańa mekteptiń boı kóterýi Qarasý halqynyń bas aýrýyna aınalǵan úsh aýysymdy oqytý máselesin tolyqtaı sheship otyrǵanyn aıta ketken jón. Endi aýyldaǵy 232 bilim alýshy sý jańa bilim uıasynda alańsyz bilim nárimen sýsyndaıdy. Qazirgi kezde bilim ordasynda 25 ustaz jemisti eńbek etip jatyr. Olardyń qatarynda pedagog-zertteýshi, pedagog-sarapshy, pedagog-moderator sanatyndaǵy bilikti ustazdar da bar.
«Qala men aýyldyń qarakózderine birdeı qarap, teń múmkindik qalyptastyryp otyrǵan Memleket basshysy Qasym-Jomart Toqaevqa aıtar alǵysymyz sheksiz. Ilgeride mundaı irgeli, barlyq jaǵdaı jasalǵan mektepterdi tek qaladan ǵana kórsek, endi ózimiz turatyn altyn besik aýylda da salynyp jatyr. Aýyl balalarynyń sapaly bilim alýyna qoldan kelgenshe qoldaý kórsetip otyrǵan barlyq azamatqa alǵystan basqa aıtarymyz joq.
Endi mektep tabaldyryǵyn attaǵan shákirtter eseıgende úzdik bilimimen daralanyp, elin, jerin súıetin adal azamattar sanatyn tolyqtyrady degen senimim zor. О́ıtkeni olardyń alańsyz bilim alýyna, Abaı armandaǵan «tolyq adam» bolyp qalyptasýyna memleket tarapynan barlyq jaǵdaı jasalǵanyn kóz kórip otyr. Sondyqtan oqýshylar erinbeı izdenis izine túsýi kerek. Endi tek balalarymyz úmitti aqtasyn degen tilek qana bar», deıdi aýyl aqsaqaly Turǵan Jasybaev.
Qarakemer aýylynda boı kótergen №54 mektepte de oqýshylardyń alańsyz bilim alýyna barlyq jaǵdaı qarastyrylǵan. Ýaqyt suranysyna saı boı kótergen jańa bilim uıasynda bilim alýshylardyń qaýipsizdigine aıryqsha basymdyq berilgen.
«Jańadan boı kótergen mektebimiz mamandyq tańdaýymyzǵa mol septigin tıgizetinine kúmánim joq. Bolashaqta dızaıner bolsam degen armanym bar. Sý jańa bilim ordasyndaǵy kabınetterdi tolyq aralap shyqtym. Munda qyz balalarǵa arnalǵan sheberhana bar eken. Jańa sheberhanada bizge qajetti dúnıeniń barlyǵy samsap tur. Bolashaqta ózim tańdaıtyn mamandyqtyń alǵashqy qadamyn dál osy jańa bilim ordasynan bastaıtynyma bek qýanyshtymyn», deıdi izdenis izine túsken bilim alýshylardyń biri Aızere Erbol qýanyshymen bólisip.
О́ńir basshysy Erbol Qarashókeevtiń aıtýynsha, oblys aýmaǵyndaǵy halyq tyǵyz ornalasqan Qordaı aýdanynda jańa bilim ordalarynyń boı kóterýi mundaǵy bilim berý áleýetin aıtarlyqtaı arttyrady. Sondaı-aq aýyldyq jerdegi balalardyń sapaly bilim alýyna barynsha múmkindik týǵyzyp otyr.
Jalpy alǵanda keıingi jyldary óńirdiń bilim salasyn órkendetý maqsatynda aýqymdy jumys atqarylyp jatyr. Naqtyraq aıtsaq, osy jyly 26 bilim nysanynyń qurylys jumysy júrgizilip jatyr. Jyl sońyna deıin 10 mektep pen 5 qosymsha ǵımarat paıdalanýǵa berilmek. Al 2026 jyly taǵy 11 jańa bilim ordasynyń irgesy qalanady.
Jambyl oblysy,
Qordaı aýdany