Memleket basshysy Qasym-Jomart Toqaevtyń Qyzylorda oblysyna sapary «Qorqyt ata» halyqaralyq áýejaıynyń jańa termınalymen tanysýdan bastaldy, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke áýejaı qyzmeti, ishki jáne halyqaralyq áýe reısterine qyzmet kórsetý prosesi jóninde baıandaldy.
Memleket basshysyna jolaýshylardy tirkeý jáne tekserý aımaqtary, shekaralyq-kedendik baqylaý pýnktteri, kútý zaly, sondaı-aq avtomattandyrylǵan júk berý júıesi kórsetildi.
Jańa termınal byltyr qarasha aıynda ashylǵan. Jobaǵa 16,6 mıllıard teńge kóleminde jeke ınvestısııa salyndy.
Jergilikti bıýdjetten ınjenerlik-kommýnıkasııalyq ınfraqurylymyn júrgizýge 4,3 mıllıard teńge bólindi.
Áýejaıdyń ótkizý qabileti jylyna 300 myńnan 500 myń jolaýshyǵa deıin ulǵaıdy. Nysan Halyqaralyq azamattyq avıasııa komıteti (ICAO) men Halyqaralyq áýe kóligi qaýymdastyǵynyń (IATA) joǵary standarttaryna sáıkes keledi.
«Qorqyt ata» áýejaıynan Air Astana, FlyArystan jáne Qazaq Air áýe kompanııalary aptasyna 29 reıs oryndaıdy. Qazirgi kezde termınal janynan «Qazaeronavıgasııa» RMK jańa dıspetcherlik munara men ákimshilik-tehnıkalyq ǵımarattyń qurylysyn júrgizip jatyr.
Jobanyń iske asýy Syr óńiriniń kólik ınfraqurylymyn damytyp qana qoımaı, týrıstik áleýeti men ınvestısııalyq tartymdylyǵyn da arttyrýǵa oń septigin tıgizedi.