Karına ANGELIEVA,
halyqaralyq ǵylym jáne tehnologııa ortalyǵynyń atqarýshy dırektory:
– Qazir biz dınamıkalyq ári derekterge negizdelgen ekonomıkalyq jáne áleýmettik dáýirge aıaq bastyq. Bul – tek ónerkásip pen ǵylym emes, sonymen qatar memleket pen qoǵam da jyldam beıimdelýdi qajet etetin ýaqyt. Geosaıası qysym, energetıkalyq daǵdarys nemese klımattyń ózgerýi sekildi syrtqy faktorlarǵa tótep berýdiń birden-bir joly – tózimdi, turaqty ınnovasııalyq ekojúıelerdi qalyptastyrý. Meniń oıymsha, Qazaqstan osy baǵytta Ortalyq Azııa óńirinde kóshbasshy el bola alady. Qazaqstan ustanyp otyrǵan saıasat óńirlik turaqtylyq pen básekege qabilettilikti arttyrýda úlgi bolarlyq deńgeıde.
Tehnologııa transferi týraly aıtqanda, men únemi «ınklıýzıvtilik», «kogezııa», «adam kapıtaly», «talanttar» jáne «ǵylymı izdenis» sııaqty uǵymdardy qatar qoldanamyn. О́ıtkeni ınnovasııanyń ózegi – adam. Ǵylymı nátıjeler men tehnologııalardy tabysty transferleý úshin eń aldymen qoǵamnyń naqty qajettilikterin túsiný qajet. Úkimettiń maqsat-mindetteri men damý ambısııasy da osy qajettiliktermen úndes bolýǵa tıis. Bul – salaaralyq jáne transulttyq deńgeıde iske asyrylatyn saıasat. Buryn biz ǵylym, bilim, ındýstrııa úshtigin qamtıtyn «Bilim úshburyshy» modelin ustanatynbyz. Biraq búgin bul tizbekke memleket pen qoǵam qosyldy. Sebebi biz ashyq derekter men jyldam aqparat almasý dáýirinde ómir súrip jatyrmyz. Sondyqtan ǵylymdy damytý Ǵylym jáne joǵary bilim mınıstrliginiń ǵana emes, barlyq memlekettik ınstıtýttyń ortaq mindeti. Qazaqstandaǵy ǵylym men ınnovasııa salasyna Prezıdent Ákimshiligi deńgeıinde erekshe nazar aýdarylyp otyrǵany asa quptarlyq is.
Halyqaralyq ǵylym jáne tehnologııa ortalyǵy osydan 30 jyl buryn, Keńes odaǵy keńistigindegi ǵylymı áleýetti saqtaý maqsatynda qurylǵan bolatyn. Sol kezde basty mıssııamyz – ǵalymdarǵa qoldaý kórsetý, olardyń zertteý áleýetin saqtap qalý edi. Búginde álem kúrdeli geosaıası daǵdarystarmen betpe-bet kelip otyr. Qazaqstan tek jasandy ıntellekt saıasaty baǵytynda batyl qadam jasap otyrǵan joq, sonymen birge halyqaralyq ǵylymı uıymdy el aýmaǵynda ornalastyrý arqyly strategııalyq kóregendik tanytty. Bul sheshim eldiń ǵylymı bedelin arttyryp qana qoımaı, jahandyq deńgeıde jańa seriktestik múmkindigine jol ashty. Qazirgi zamanda ǵylym men ónerkásip toǵysy – memlekettiń strategııalyq turaqtylyǵynyń kórsetkishi. Halyqaralyq ǵylym jáne tehnologııa ortalyǵy tájirıbesi kórsetkendeı, ǵylym tek zerthanada emes, qoǵam men óndiris arasynda júrip jatqan ómirsheń úderiske aınalýǵa tıis. Qazaqstan dál osy baǵytta aımaqtyq kóshbasshylyq tanytýǵa barlyq múmkindigi bar memleket.