Ulytaý oblysynyń ortalyǵy Jezqazǵan qalasynda «Halyqtyq zańger» atty respýblıkalyq aksııa ótti. Bul bastamanyń maqsaty – zań ústemdigin nyǵaıtý, azamattardyń quqyqtyq saýatyn arttyrý jáne memlekettik ári zańgerlik qyzmetterdiń qoljetimdiligin qamtamasyz etý.
Aksııa aıasynda árbir azamat tegin quqyqtyq keńes alyp, mańyzdy máseleler boıynsha túsinikteme jáne quqyqtaryn qorǵaý jóninde naqty kómek ala alady. Is-sharaǵa prokýratýra organdary, ádilet jáne polısııa qyzmetkerleri, áleýmettik qorǵaý, bilim jáne densaýlyq saqtaý salasynyń ókilderi, sondaı-aq tájirıbeli zańgerler men advokattar qatysty.
Is-sharada áleýmettik qoldaý jáne áleýmettik tólemder, otbasy men balalardyń quqyqtaryn qorǵaý, kásipkerlerdiń quqyqtaryn qorǵaý, eńbek jáne jer qatynastary, alaıaqtyqtyń aldyn alý jáne azamattardy qorǵaý, sondaı-aq turǵyn úı-kommýnaldyq máselelerine erekshe nazar aýdaryldy. Kelip túsken árbir ótinish jeke qaralyp, tıisti organdarǵa joldanyp, prokýrorlyq baqylaýǵa alynady.
«Basty mindetimiz – árbir turǵynǵa kómek kórsetý, suraǵyna jaýap berip, zańdy quqyqtaryn qorǵaýǵa qoldaý kórsetý. Biz zań ústemdigin qamtamasyz etýge, azamattardyń quqyqtary men zańdy múddelerin qorǵaýǵa jáne qoǵamdaǵy turaqtylyqty saqtaýǵa baǵyttalǵan jumysymyzdy tabandy túrde júrgize beremiz», deıdi zań ókilderi.
Ulytaý oblysynyń prokýratýrasy halyqpen ashyq dıalogti jalǵastyra beredi. Aksııa aıasynda júzdegen adam tegin quqyqtyq kómek aldy.
Ulytaý oblysy