Qazaqstannyń «Aq jol» demokratııalyq partııasynyń tóraǵasy, Parlament Májilisiniń depýtaty Azat Perýashev bastaǵan partııanyń Baqylaý-revızııalyq komıssııasynyń tóraǵasy Bolat О́tepbaev, partııa fılıalynyń jetekshisi ári Astana qalalyq maslıhatynyń depýtaty Asqar Smaǵulov Jambyl jerine arnaıy saparmen keldi, dep jazady Egemen.kz.
Azat Turlybekuly «Aq jol» dempartııasynyń Jambyl oblystyq fılıalynda máslıhattardaǵy depýtattardyń aǵymdaǵy jumystary jóninde keńes ótkizdi.
«Búginde Jambyl óńirinde oblystyq, qalalyq jáne aýdandyq maslıhattarda partııamyzdyń atynan 19 depýtat qyzmet etýde. О́tken aptada Qostanaıda barlyq deńgeıdegi máslıhat depýtattarynyń forýmyn ótkizgen bolatynbyz. Keńes otyrysynda osy jıynda kóterilgen máselelerdi qortyndylap, óńirlerdegi áriptesterimiz úshin ózekti problemalardy talqyladyq.
Partııalastar tarıfter men monopolısterdiń ókilettigin asyra paıdalanýyn, ınflıasııa máselesi jáne halyq tutynatyn taýarlardy (kıim, aıaq kıim, azyq-túlik) óndirýshilerdi, aýyl sharýashylyǵy ónimderin qaıta óńdeýshilerdi qoldaý qajettiligi, sondaı-aq keden saıasatynyń turaqtylyǵy men boljamdylyǵy máselelerin kóterdi. Qant zaýyttarynyń birinde agroónerkásiptik keshendegi jaǵdaı boıynsha keńes ótkizý týraly usynys jasaldy. «Aq jol» dempartııasy fraksııasynan «Jergilikti memlekettik basqarý týraly» zań jobasyn talqylaýǵa barynsha qatysyp, depýtattar men máslıhattardyń ókilettikterin keńeıtý men kúsheıtýge qol jetkizýdi surady. Olar máslıhat tóraǵalarynyń depýtattar qyzmetin shekteý boıynsha josparlaryna, mysaly, túsiniksiz syltaýlarmen sessııalarǵa qatysýdy shekteý máselesine alańdaýshylyq bildirdi.
О́ńirdegi ókilderimiz Parlamenttiń aldaǵy konstıtýsııalyq reformasyn qoldaıdy. Prezıdent Q.Toqaevtyń AQSh-qa saparyn qyzyǵýshylyqpen talqylap, Jambyl oblysynyń ónerkásibi men agroónerkásiptik keshenine sheteldik ınvestısııalardyń ósýin atap óttik», - deıdi Azat Perýashev.
Budan soń Azat Turlybekuly bastaǵan top: partııanyń Jambyl oblystyq fılıalynyń, oblystyq máslıhattaǵy turaqty komıssııanyń tóraǵasy Muqanbetáli Shalqarbekov, oblystyq máslıhattyń depýtaty Dáýren Ahmetjaev jáne Taraz qalalyq máslıhatynyń depýtattary Rýslan Myrqalyqov, Baýyrjan Naızaqulov, Shahan Baıkenjeevpen birge Taraz kóterme taratý ortalyǵyna bardy.
Halyq qalaýlylaryn ortalyqtyń quryltaıshysy Altaı Karabekov qarsy alyp, ınfraqurylym, logıstıkalyq múmkindikterin tanystyrdy. Sondaı-aq aımaqtaǵy azyq-túlik qaýipsizdigin qamtamasyz etýdegi ortalyqtyń róline toqtalyp ótti.
Taraz kóterme taratý ortalyǵy – aýyl sharýashylyǵy ónimderin jınaqtap, saqtaý jáne aımaqtyq naryqqa tıimdi taratýǵa arnalǵan zamanaýı keshen. Munda salqyndatylǵan saqtaý qoımalary, júk túsirý men jóneltý alańdary, sondaı-aq ónim sapasyn baqylaý júıeleri qarastyrylǵan. Bul ortalyqta 10 myń tonnaǵa deıin kókónis ónimderi saqtalady.
Osy arqyly aımaq turǵyndaryna kókónis ónimderin tıimdi baǵada taratýǵa múmkindik bar. Bul bir jaǵynan baǵa baǵamyn turaqtandyrýǵa septigi mol.
Azat Turlybekuly ortalyqtaǵy jumys prosesimen tanysyp, ortalyq arqyly aýyl sharýashylyǵy ónimderin tutynýshyǵa tikeleı jetkizetin tetikterge, fermerlermen ózara árekettesý men logıstıka salasyndaǵy týyndaıtyn máselelerge nazar aýdardy.
Búginde Taraz kóterme taratý ortalyǵynda jalǵa alý negizinde Rich Gold kompanııasy da óz jumysyn júrgizip otyr. Zamanaýı kásiporyn jemis-jıdekterdi óńdep, shyryn, pýlpa, pıýre jáne konsentrattar óndiredi. Kompanııa óndiriletin otandyq ónimderdiń úlesin arttyryp, aýyl sharýashylyǵyn damytýǵa úles qosýdy kózdeıdi.
Kásiporyn jemis ósiretin dıhandarmen tyǵyz áriptestik ornatqan. Osy arqyly aýyl sharýashylyǵy ónimderin óndirýshilerdiń ónimderin satyp alyp, olardyń eńbegin tıimdi etýge kómektesip keledi. Rich Gold-tyń óndirge tabıǵı, ekologııalyq taza jáne paıdaly ónimdi tutynýshylar tarapynan úlken suranysqa ıe.