Memleket basshysy Nursultan Nazarbaev Máskeýde Reseı Federasııasynyń Prezıdenti Vladımır Pýtınmen kezdesti, dep habarlady Prezıdenttiń baspasóz qyzmeti.
Nursultan Nazarbaev pen Vladımır Pýtın ekijaqty ózara yqpaldastyqtyń, sonyń ishinde, saýda-ekonomıka, otyn-energetıka, ǵarysh salalary men mádenı-gýmanıtarlyq saladaǵy keń aýqymdy máselelerin talqylady.
Qazaqstan men Reseı prezıdentteri óńirlik jáne halyqaralyq kún tártibindegi birqatar ózekti máselelerdi de qarastyrdy.
Nursultan Nazarbaev óziniń Qazaqstan Prezıdenti bolyp saılanǵannan keıin shetelge alǵashqy resmı saparmen shyǵyp otyrǵanyn atap ótti.
– Biz 15 jyldan astam ýaqyt boıy birge jumys istep kelemiz, osy jyldary Qazaqstannyń Reseımen qarym-qatynasy nyǵaıdy. Biz Sizben Odaqtastyq týraly shartqa qol qoıdyq, onyń aıasynda kóptegen máseleler júzege asyrylýda. Biz Eýrazııalyq ekonomıkalyq odaqty qurdyq. Daǵdarys jaǵdaıynda elderimizdiń arasyndaǵy taýar aınalymy tómendegenine qaramastan, EAEO-nyń bolashaǵy zor dep esepteımin. Elderimizdiń ekijaqty qarym-qatynastary jasalǵan ýaǵdalastyqtarǵa saı damyp keledi, – dedi Memleket basshysy.
Qazaqstan Prezıdenti, sondaı-aq, V.Pýtındi Uly Otan soǵysyndaǵy Jeńistiń 70 jyldyǵymen quttyqtady.
Vladımır Pýtın de Nursultan Nazarbaevty saılaýdaǵy aıqyn jeńisimen quttyqtap, eki el arasyndaǵy jemisti yntymaqtastyqtyń jalǵasatynyna úmitin bildirdi.
– Eldegi sońǵy jyldardaǵy ózgerister, Qazaqstan azamattarynyń saılaý naýqanyna qalaı qaraıtyny, olardyń Sizdiń atqarǵan jumysyńyzǵa qalaı baǵa beretini – eń qundysy osy. Bizdiń ekijaqty baılanystarymyz budan ári de qarqyndy jáne saılaýǵa deıingi jyldardaǵydaı jemisti bolatynyna senimdimin, – dedi Reseı Prezıdenti.
Sondaı-aq, V.Pýtın ıntegrasııalyq úderister salasyndaǵy bastamalary úshin Qazaqstan Prezıdentine alǵys aıtty.
– Búginde bizderdiń jasap jatqanymyzdyń, ekonomıkalyq odaǵymyzdy tereńdete túsý baǵytyndaǵy qosymsha qadamdardyń deni Sizdiń eńbegińiz. Sizdiń Keden odaǵyn, odan soń EAEO-ny qurý týraly bastama kóterip, sóılegen kezińiz meniń óte jaqsy esimde. Eń bastysy, Qazaqstannyń óz damýymen de, ıntegrasııalyq úderisterdiń óristeýimen de baılanystynyń barlyǵy júzege asýda, – dedi Reseı Prezıdenti.
* * *
Elbasy Nursultan Nazarbaev Uly Otan soǵysyndaǵy Jeńistiń 70 jyldyǵyn merekeleý sharalary aıasynda Máskeýde Egıpet Prezıdenti Ábdel Fattah as-Sısımen kezdesti, dep habarlady Prezıdenttiń baspasóz qyzmeti.
Eki eldiń Memleket basshylary saıası jáne saýda-ekonomıkalyq saladaǵy ekijaqty yntymaqtastyq máselelerin, sondaı-aq, qarym-qatynastardyń odan ári damý keleshegin talqylady.
Sonymen qatar, Nursultan Nazarbaev pen Ábdel Fattah as-Sısı halyqaralyq kún tártibindegi meılinshe ózekti máseleler jóninde pikir almasty.
* * *
Elbasy Nursultan Nazarbaev Máskeýde Uly Otan soǵysyndaǵy Jeńistiń 70 jyldyǵyn merekeleý sharalary aıasynda Vetnam Prezıdenti Chyong Tan Shangpen kezdesti, dep habarlady Prezıdenttiń baspasóz qyzmeti.
Eki eldiń kóshbasshylary saýda-ekonomıka jáne ınvestısııa salalaryndaǵy yqpaldastyqtyń negizgi baǵyttaryn qarastyrdy.
Qazaqstan men Vetnam prezıdentteri halyqaralyq kún tártibindegi ózekti máselelerdi de qozǵady.
Sonymen qatar, Chyong Tan Shang Nursultan Nazarbaevty prezıdenttik saılaýdaǵy jeńisimen taǵy da quttyqtady.