Qazaqkonsertte uly aqyn Abaı Qunanbaıulynyń 180 jyldyǵyna arnalǵan mýzykalyq kesh ótedi. Kópshilik nazaryna alǵash ret kemeńger oıshyldyń buryn-sońdy oryndalmaǵan shyǵarmalary usynylady, dep jazady Egemen.kz.
Osylaısha, Roza Baǵlanova atyndaǵy «Qazaqkonsert» memlekettik akademııalyq konserttik uıymy jańasha mýzykalyq óńdeýler men zamanaýı aranjırovkalar arqyly Abaı murasy jańǵyryp, kórermenge ózgeshe áser syılaıdy.
Konserttik baǵdarlamada «Uly Abaı», «Ǵulama-Abaı», «Esińde bar ma jas kúniń», «Jasymda ǵylym bar dep eskermedim...», «Abaıdyń Aqtolqyny», «Abaı tolǵaý» jáne taǵy basqa shyǵarmalar oryndalady.
Is-sharaǵa «Halyq qazynasy» ulttyq óner ortalyǵynyń solısteri Qazaqstannyń eńbek sińirgen qaıratkerleri Janǵalı Júzbaı, Qumarbek Qalqataı, Aızat Qarabek, Tolǵanbaı Sembaev, Qaırat Aıtbaev, «Mádenıet salasynyń úzdigi» tósbelgisiniń ıegerleri Baýyrjan Bekmuhanbet, Perızat Turar, «Daryn» memlekettik jastar syılyǵynyń laýreaty Kúnsulý Túrikpen, respýblıkalyq jáne halyqaralyq baıqaýlardyń laýreattary Birjan Aıtahmet, Álıhan Dúısenbaı, Aqerke Tájibaeva, Venera Tabys jáne Jantý Dadabaev qatysady.
Mýzykalyq kesh Astana qalasy Máńgilik el, 10/1 mekenjaıynda 13 qarasha, 19:00 ótedi.