Prezıdent Qasym-Jomart Toqaev О́zbekstanǵa memlekettik sapary kezinde qazaq pen ózbek baýyrlas halyqtar, ejelden enshisi bir tatý kórshiler ekenin atap ótti. Sondaı-aq Memleket basshysy qazaq-ózbek shekarasynda ashylatyn Halyqaralyq ónerkásip kooperasııasy ortalyǵy ózara saýdany damytýǵa sony serpin beretinine toqtaldy.
Qazaqstan men О́zbekstan Prezıdentteri qol qoıǵan «Ortalyq Azııa» halyqaralyq ónerkásiptik kooperasııa ortalyǵyn (HО́KO) qurý jónindegi Jol kartasyn iske asyrý boıynsha Túrkistan oblysynyń ákimdigimen aýqymdy jumystar júrgizilip keledi. Ortalyqta 7 áleýetti ınvestor óz jobasyn júzege asyrýǵa qyzyǵýshylyq tanytyp otyr. Nátıjesinde, 123 mlrd teńge ınvestısııa tartylyp, 3 myńnan asa jumys orny qurylady. Bıýdjetke qosymsha 355 mln teńge salyq túsedi. Ortalyqty ınvestısııalyq jobalarmen toltyrý maqsatynda ákimdik 8 daıyn óndiris ǵımaratyn salý jumysyn júrgizýde. Qazirgi tańda 5 ǵımarattyń qurylys jumysy tolyǵymen aıaqtalyp, 3 ǵımarattyń sendvıch-panelderdi montajdaý jumystaryn qarasha aıynyń sońynda tolyq aıaqtaý kózdelgen.
Sondaı-aq kórshi elmen qarym-qatynasty nyǵaıtý, aımaqaralyq áriptestikti keńeıtý, týrızm salasyndaǵy birlesken jobalardy júzege asyrý jáne tájirıbe almasý maqsatynda jýyrda túrkistandyq delegasııa О́zbekstannyń birqatar qalasynda bolyp qaıty. Túrkistanda jyl saıyn 3 mln-nan asa jolaýshyǵa qyzmet kórsetetin halyqaralyq áýejaı jumys isteıdi. Áýe qatynasyn damytý maqsatynda biz jeńildigi bar arnaıy baǵdarlama ázirledik. Ortalyq Azııanyń ejelgi rýhanı ortalyqtary arasyndaǵy turaqty áýe reısteri transshekaralyq týrızmdi damytýǵa jáne Qazaqstan men О́zbekstan óńirleri arasyndaǵy yntymaqtastyqty keńeıtýge qosymsha serpin beredi. Sonymen qatar aýyl sharýashylyǵy ónimderin tereń óńdeý, maqta-toqyma klasterin damytý baǵytynda ınvestorlarmen birqatar kelisimge qol jetkizildi.
Nuralhan KО́ShEROV,
Túrkistan oblysynyń ákimi