Ulytaý oblysynda Aýyl sharýashylyǵy qyzmetkerleriniń kúnine arnalǵan «Gúldense aýyl – gúldenedi elimiz» atty oblystyq forým ótip jatyr. Bul mereke - elimizdiń ekonomıkalyq turaqtylyǵy men halyqtyń ál-aýqatyn jaqsartýǵa úles qosqan eńbekkerlerdiń kúni, dep habarlaıdy Egemen.kz.
Forýmǵa Aýyl sharýashylyǵy vıse-mınıstri Amanǵalı Berdalın, oblys ákimi Dastan Ryspekov, QR Parlamenti Senaty men Májilisiniń depýtattary, oblystyq máslıhat ókilderi, sondaı-aq jergilikti fermerler men aýyl sharýashylyǵy taýaryn óndirýshiler qatysýda.
Is-shara jumysy «AgroQazaq: Tehnıka. О́nim. Bolashaq» kórmesinen bastaldy. Kórmede aýyl sharýashylyǵy tehnıkasy men «Bir aýyl – bir ónim» jobasynyń óńirlik qatysýshylarynyń ónimderi usynyldy.
Ulytaý oblysy eginshilik pen mal sharýashylyǵy damyp kele jatqan óńir. Oblysta ishki óndiristi arttyrýǵa baǵyttalǵan birqatar mańyzdy jobalar júzege asyrylyp otyr. Atap aıtqanda, et óńdeý baǵyty boıynsha óndirister iske qosylyp, jumyrtqa óndiretin qus fabrıkasy jumysyn bastady. Azyqtyq bazany nyǵaıtý maqsatynda sýarý júıeleri engizildi. Egis alqaptaryn ulǵaıtý baǵytynda júıeli jumystar qolǵa alynǵan.
Oblys qurylǵaly beri aýyl sharýashylyǵy salasyna 8,5 mlrd. teńge ınvestısııa tartyldy. Jyl basynan bastap bul salaǵa 2,5 mlrd. teńge ınvestısııa quıylyp, ótken jylǵy sáıkesinshe kezeńimen salystyrǵanda bul kórsetkish 46 paıyzǵa ósti.
Bıylǵy jyly agroónerkásiptik keshen sýbektilerin sýbsıdııalaýǵa 4,4 mlrd teńge bólindi. Bul qarajat shamamen 780 sharýa qojalyǵyna kómek kórsetip, olardyń tehnıkasyn jańartýyna, zamanaýı tehnologııalardy engizýine, óndiris ónimdiligi men básekege qabilettiligin arttyrýyna múmkindik berdi.
Jyl basynan beri shamamen 200-den astam túrli aýyl sharýashylyǵy tehnıkasy satyp alyndy. Bul aýyl sharýashylyǵy tehnıkasy parkin 6,5%-ǵa jańartýǵa múmkindik berdi. Nátıjesinde, 2025 jyldyń 10 aıynda aýyl sharýashylyǵy ónimderiniń jalpy shyǵarylym kólemi 58,3 mlrd. teńgeni qurady, al egin jınaý kólemi 20 myń gektardy qamtydy. Barlyq jınaqtalǵan astyq kólemi 21 myń tonnany qurap, ortasha túsim gektaryna 11 sentner deńgeıinde boldy. (2024 jyly 8 sentrnerdi qurady).
Bıyl óńirimizde alǵashqy ret «Otbasylyq ferma» jobasynyń praktıkalyq iske asyrylýy bastaldy. Bastamaǵa 34 sharýa qojalyǵy men 2 aýyl sharýashylyǵy óndiristik kooperatıvi qatysyp otyr.
Joba aıasynda 8 myń asyl tuqymdy iri qara, 13 myń qoı men 2 myń jylqy satyp alyndy. Infraqurylymǵa oblystyq bıýdjetten 1,2 mlrd teńge bólinip, turǵyn úıler, qora-jaılar salynyp, sý jáne elektr jelileri tartyldy. Baǵdarlamanyń ereksheligi mal basyn ósirýden, mal bordaqylaý, soıý sehyn, bıe sútin óńdeý, vakýýmdalǵan et ónimderin shyǵarý deıin tolyq óndiristik sıkldi qamtylý bolyp tabylady.
Jobanyń negizgi mindetteriniń biri - óńirdegi bordaqylaý alańdaryna maldyń turaqty jáne ýaqytyly jetkizilýin qamtamasyz etý. Bul azyq-túlik qaýipsizdigin aıtarlyqtaı kúsheıtedi.
Sonymen birge, joba ishki naryqty sapaly jemshóppen qamtamasyz etýge jáne turaqty jemshóp qoryn qalyptastyrýǵa baǵyttalǵan.
Aldymyzda jer resýrstaryn tıimdi paıdalaný, sýarmaly jerlerdi damytý, ónimdilikti arttyrý, ınvestısııa tartý jáne jańa jumys oryndaryn qurý mindetteri tur.
Jaqynda oblys delegasııasy Memleket basshysy Qasym-Jomart Toqaevtyń qatysýymen ótken Respýblıkalyq aýyl sharýashylyǵy forýmyna qatysty. Is-sharada mal sharýashylyǵyna qosqan eleýli eńbegi úshin ulytaýlyq Asqar Álıuly «Ereń eńbegi úshin» medalimen marapattaldy.
Osyndaı el aldyndaǵy mańyzdy mindetti abyroımen atqaryp, halqymyzdyń ál-aýqatyn arttyrýǵa eleýli úles qosyp kele jatqan aýylsharýashylyq salasynyń qyzmetkerleri men eńbekkerlerin Ulytaý oblysynyń ákimi Dastan Ryspekov merekemen quttyqtap, alǵys aıtty.
Ulytaý oblysy