Bul týraly búgin Senat kýlýarynda BAQ ókilderine Densaýlyq saqtaý birinshi vıse-mınıstri Tımýr Sultanǵazıev aıtty, dep jazady Egemen.kz.
Vıse-mınıstrdiń sózinshe, qazir Densaýlyq saqtaý mınıstrligi Úkimetpen birlesip tıisti esep-qısapty júrgizip jatyr.
2020-2023 jyldary dárigerlerdiń jalaqysy – 30 paıyzǵa, orta býyn medısına qyzmetkerleriniń jalaqysy – 20 paıyzǵa artqan. Al 2024 jyly medısınaǵa tikeleı qatysty emes qyzmetkerleriniń, onyń ishinde jedel járdem júrgizýshileriniń eńbekaqysy 18 paıyzǵa ósken.
Endi feldsherler men jedel járdem jumysyna qatysty ózge de mamandardyń jalaqysyn kóterý kózdelip otyr.
«Qazir feldsherdiń eń tómengi jalaqysy 180 000-190 000 teńge shamasynda. Tájirıbesine qaraı bul soma 260 000 teńgege deıin jetýi múmkin. Al jedel járdem júrgizýshileri 160 000-180 000 teńge aınalasynda jalaqy alady. Úkimet usynysymyzdy qoldasa keler jyldan bastap feldsherler men jedel járdem júrgizýshileriniń jalaqysy kóbeıedi», dedi Tımýr Sultanǵazıev.
Atalǵan mamandardyń jalaqysy qansha paıyzǵa artatyny áli naqtylanbaǵan. Densaýlyq saqtaý birinshi vıse-mınıstri bul másele Qarjy mınıstrligimen birlese talqylanyp jatqanyn málimdedi.
Aıta keteıik, kúni keshe Májilistiń jalpy otyrysynda jedel járdem qyzmetkerlerin jappaı beınetirkegishpen qamtý máselesi qoldaý tapqan bolatyn.
Sondaı-aq dárigerlerdiń ómiri men quqyqtaryn qorǵaýǵa arnalǵan jańa normalar usynyldy.
Buǵan deıin sala mamandaryn qoldaý aıasynda 8,5 – 10 mln aralyǵynda áleýmettik tólem beriletinin jazǵan bolatynbyz.