Mańǵystaý oblysyndaǵy ADVANTA.KZ jekemenshik mektep-lıseıine 108 mln teńgeden astam qarjy aýdaryldy. Bul – Qarjy mınıstrliginiń e-Qazyna platformasyndaǵy jańa OrtaBilim sıfrlyq servısi arqyly qarjylandyrýdy alǵash bolyp alǵan otandyq bilim uıymy, dep habarlaıdy Egemen.kz.
Jańa servıs mektepterdi qarjylandyrý jumysyn barynsha ashyq etýge baǵyttalǵan. Buǵan deıin júrgizilgen aýdıtter qaǵaz júzinde oqýshylar sanyn asyryp kórsetý, shtatta bar bolyp kóringenimen is júzinde jumys istemeıtin qyzmetkerlerdiń tirkelýi, mektep ǵımaratynyń talapqa saı bolmaýy sekildi kóptegen zańbuzýshylyqty anyqtaǵan edi. Keı óńirlerde oqýshylar toıhana sekildi oryndarda bilim alǵan jaǵdaılar da tirkelgen.
OrtaBilim servısi osy máselelerdi joıýdy kózdeıdi. Endi árbir mekteptiń bıýdjeti, oqýshy sany, kezegi, ótinimderi sıfrlyq júıede ashyq kórsetiledi. Júıe avtomatty formatta logıkalyq tekserister júrgizedi. Mysaly, oqýshynyń nemese muǵalimniń JSN birneshe memlekettik derekter bazasymen salystyrylyp, onyń naqty tirkelgen-tirkelmegeni birden anyqtalady. Oqýshylar týraly derekter «Elektrondy kúndelik» júıesimen biriktirilgen, sondyqtan málimetter avtomatty túrde jańaryp otyrady. Nátıjesinde aqsha naqty oqyp jatqan balalar sanyna sáıkes tólenedi.
Qazir bıýdjet Ulytaý, Qyzylorda jáne Aqmola oblystarynan basqa barlyq óńirde jarııalanǵan. Al jergilikti mektepter qarjylandyrýǵa ótinish bermes buryn óńirlik bilim basqarmalary bıýdjetterdi ashyq jarııalaýy qajet.
Vedomstvonyń málimetinshe, jekemenshik mektepter elimizdiń bilim berý júıesinde mańyzdy ról atqarady. Olar mektep tapshylyǵyn azaıtýǵa kómektesedi jáne bıýdjetke túsetin júktemeni jeńildetedi. Degenmen, bólinetin qarajattyń tıimdi ári ádil jumsalýy qatań baqylaýdy talap etedi. Sondyqtan keleshekte osy saladaǵy básekelestikti arttyrý úshin vaýcherlik júıe engizý josparlanyp otyr.
OrtaBilim – Qarjy mınıstrligine qarasty «Aqparattyq-esepteý ortalyǵy» AQ ázirlegen otandyq sıfrlyq ónim. Bul ortalyq – Qazaqstandaǵy eń tájirıbeli IT uıymdarynyń biri. Bıyl onyń qurylǵanyna 32 jyl toldy. 1993 jyly 2 qarashada QR Mınıstrler kabıneti qaýlysymen qurylǵan ortalyq osy ýaqyt ishinde Memlekettik múlik tizilimi, astyq qolhattary júıesi, qarjy eseptilik depozıtarııi, Azamattardyń bankrottyǵy, memlekettik shekaradaǵy elektrondy kezek, CarGoRuqsat jáne CarGoAlem, bızneske arnalǵan memlekettik qoldaý sharalarynyń biryńǵaı tizimi, munaı jáne alkogol ónimderin esepke alý júıeleri, Jer qoınaýyn paıdalanýdyń biryńǵaı platformasy sııaqty kóptegen mańyzdy aqparattyq júıeni ázirlep, olardy turaqty túrde qoldap keledi. Ortalyqtyń barlyq servısteri derekterdiń qaýipsizdigi boıynsha mindetti attestattaýdan ýaqtyly ótip otyrady.