Almatynyń «Qaırat» fýtbol klýby ÝEFA Chempıondar lıgasynyń jalpy kezeńindegi kezekti matchyn ótkizdi. Syrt alańda Danııanyń «Kopengagen» klýbymen tartysqa túsip, ese jiberdi.
Besinshi týrda «Kopengagen» fýtbolshylary «Qaıratty» barynsha sheńgeldep, iri eseppen oısyrata utýǵa umtylǵan edi. 26-mınýtta Vıktor Dadason enshisine gol jazyp, esep ashqan soń da qarsylastar shabýyldy údetti. Djordan Larsson 59-mınýtta penaltıden nátıjeni eseleı tústi. Úshinshi goldy 73-mınýtta Robert Skýtch soqqannan keıin alań ıeleri aıylyn bosatyp, erkinsı bastaǵan edi. 81-mınýtta Dastan Sátbaev «Kopengagen» qaqpashysy Kotarskıdiń aıaǵyndaǵy dopty ilip áketip, esep aıyrmasyn qysqartty. 90-mınýtta Oljas Baıbek ekinshi goldy toǵytyp, alań ıelerin bir silkip aldy. Rafael Ýrazbahtınniń shákirtteri talaı ot pen sýdan ótip sharbolattaı shyńdalǵanyn kórsetti. Erkin Tapalovtyń alystan soqqan dobyn qaqpashy emes, qaqpanyń baǵany qaıtardy. Odan keıin de gol soǵatyn múmkindik týdy da.
Dastan Chempıondar lıgasynda gol soqqan eń jas oıynshylardyń qataryna endi. «Kopengagen» qaqpasyna gol soqqan kúni ol 17 jastan 105 kún asqan bolatyn. Onyń aldyn ıspandyq fýtbolshylar Ansý Fatý (17 jas 40 kún) men Lamın Iаmal (17 jas 68 kún) ǵana orap tur. «Qaırattyń» shabýylshysy ÝEFA Chempıondar lıgasynda gol soqqan tuńǵysh qazaq fýtbolshysy atandy.
«Qaırat» fýtbolshylary kelesi matchyn 9 jeltoqsanda «Astana Arena» stadıonynda ótkizip, Grekııanyń «Olımpıakos» klýbymen tartysqa túsedi.