Qyrǵyz Respýblıkasynyń Mınıstrler kabıneti tóraǵasynyń orynbasary Edıl Baısalov bastaǵan baýyrlas qyrǵyz elinen Almatyǵa issaparmen kelgen delegasııa qaladaǵy birqatar nysandardy aralady.
Kórshi el delegasııasy Áýezov aýdanyndaǵy Komıýnıtı ortalyǵynyń jumys tájirıbesimen tanysty. Meımandardy ortalyq qyzmetkerlerimen birge qarsy alǵan Mádenıet jáne aqparat vıse-mınıstri Qanat Ysqaqov kórshi elmen baılanystyń máni tereńde ekenine toqtaldy. Ol eki el arasynda tek mádenı, rýhanı áriptestik qana emes, osyndaı tájirıbe almasýlar da bolǵany mańyzdy ekenin aıtty.
Qyrǵyz delegasııasy elimizde bolyp jatqan reformalar men ózgeristerge árdaıym tilektestik bildiretinin ári mańyzdy sheshim qabyldar kezde ózderi de sol tájirıbege súıenetinin jetkizdi.
«Qazaq-qyrǵyz ejelden tamyry men tarıhy egiz halyq bolǵandyqtan, biz eń aldymen qaı salada da Qazaqstannyń tájirıbesin alǵa ustaımyz. Quramynda Prezıdent ákimshiligi, Mınıstrler kabınetiniń ókilderi bar bizdiń delegasııa Almatydaǵy halyqqa qyzmet kórsetý nysandaryn aralaı otyryp, tájirıbelerińizge tánti boldyq. Ashyǵyn aıtqanda, densaýlyq saqtaý, bilim berý, ınnovasııa, sıfrlandyrý sekildi negizgi salalardyń bárinde Qazaqstannyń úlgisinen úırenerimiz mol. Jańa tehnologııa dáýirinde zamanaýı múmkindikterdi keńinen paıdalaný – el ómirin jaqsartýdaǵy basym baǵyttardyń biri», dedi Edıl Baısalov.
«Jastar» ǵylymı-zertteý ortalyǵynyń dırektory Gúlishan Nahbaevanyń aıtýynsha, jylyna 800 myńnan astam jasqa qyzmet kórsetýdi maqsat tutqan alań shyǵarmashylyq bastamalardy damytý men ıdeıa almasýdy kózdeıdi. Atalǵan alańdardyń negizgi maqsaty – jumyssyz júrgen NEET sanatyndaǵy jastarǵa qoldaý bildirý jáne óskeleń urpaqty mektep baǵdarlamasynan bólek, qosymsha daǵdylardy meńgerýge baýlý. «Qazaq-qyrǵyz jastarynyń ártúrli platformalarda bas qosyp turýy qalypty qubylysqa aınalǵan. Bul kezdesý bizdiń jastarymyz arasyndaǵy baılanystyń jańa deńgeıiniń kórsetkishi» deıdi ol.
Sonymen qatar qonaqtar Almatyda Eńbek mobıldiligi ortalyǵyna bas suǵyp, áleýmettik-eńbek salasyndaǵy qyzmet túrleri shoǵyrlanǵan ujymnyń tynys-tirshiligimen de tanysty. Delegasııany Eńbek jáne áleýmettik qorǵaý mınıstri Svetlana Jaqypova qarsy alyp, elimizdiń áleýmettik sıfrlandyrý salasyndaǵy tyń jańalyqtar týraly baıandady.
Ortalyq barlyq eńbekke qabiletti sanattarǵa qyzmet kórsetedi. Munda memlekettik qyzmet tutastaı avtomattandyrylǵan. Mamandardyń aıtýynsha, azamattar qyzmetterdi elektrondyq eńbek bırjasy arqyly alyp, ótinimder qaldyra alady. Mınıstr, qyrǵyz elinen kelgen áriptesterine el turǵyndaryna qatysty barlyq málimetter tizbegi shoǵyrlanǵan elektrondy alańnyń jumysy týraly aıtyp, jyl ótken saıyn júıe jetildirilip otyrǵanyn jetkizdi. Qyrǵyz elinen kelgen delegasııa negizgi salalardy sıfrlandyrý baǵytynda elimizdiń tájirıbesin joǵary baǵalady. Sondaı-aq taraptar eki el arasyndaǵy jan-jaqty áriptestik, ásirese sıfrlandyrý áleýmettik qamsyzdandyrý, ekonomıka jáne bilim salalarynda aıtarlyqtaı qarqyn ala bastaǵanyna toqtaldy.
Memlekettik qyzmetterdi sıfrlandyrý boıynsha elimizdiń eGov tájirıbesi Qyrǵyzstanǵa úlgi retinde usynylyp, birqatar birlesken jobalar iske asyp keledi. Sol sekildi zeınetaqy júıesi, áleýmettik tólemder, halyqty tirkeý jáne ataýly kómek kórsetý prosesteri boıynsha tájirıbe almasý baǵytynda birlesken bastamalar oń nátıjesin berip otyr.
Gúlbarshyn AITJANBAIQYZY,
Arman OKTIаBR,
«Egemen Qazaqstan»
ALMATY