Oblys ortalyǵynda jol erejesin buzyp, kameranyń qyraǵy kózine túsip qalǵandarǵa aıyppul kele bastaýy múmkin. Shahar boıynsha 14 qarashadan bastap 100 apparattyq-baǵdarlamalyq keshen iske kiristi.
«Qaýipsiz qala» úsh jyldyq jobasy aıasynda Pavlodarda 14 qarashadan bastap kóshe qıylysynda ornatylǵan apparattyq-baǵdarlamalyq keshender jumys isteı bastady. Jospar boıynsha qala kóshelerinde alǵashqy 100 apparattyq-baǵdarlamalyq keshen (ABK) iske qosyldy. Sondaı-aq qoǵamdyq tártipti baqylaıtyn 3 myń jalpy beınebaqylaý kamerasy birtindep júıege jalǵanyp jatyr.
«Oblysta jalpy sany 420 ABK ornatý kózdelgen edi. Sonyń 240 danasy Pavlodarda ornatyldy. Alǵashqy 100-i iske kiristi. Kólik júrgizýshiler jol erejesin buzbaı, abaılap júrgeni abzal. Sebebi ABK-niń barlyǵy polısııanyń jedel basqarý ortalyǵyna jalǵanǵan. Ári Ishki ister mınıstrligine, prokýratýra organdaryna tikeleı kórsetilim júrgiziledi. Sondyqtan jol erejesin buzǵan kólik ıelerine polısııa organdary tarapynan aıyppul kele bastaýy múmkin», dep habarlady óńirlik sıfrlyq tehnologııalar basqarmasynyń basshysy Aǵybaı Ámirın.
Basqarma basshysynyń aıtýynsha, ár kóshe qıylysynda 5-ten 10-ǵa deıin álgindeı ABK bar. Olardyń sany joldyń eki nemese odan da kópjolaqty bolýyna baılanysty aldyn ala belgilenip ornatylǵan. Qazirgi ýaqytta elimizdiń avtojoldaryndaǵy avtomatty beınebaqylaý júıelerinde eń jıi tirkeletin zań buzýshylyq – júrgizýshiler tarapynan jyldamdyqty shamadan tys asyrý. ABK áýelgi kezekte jyldamdyqty asyrǵandardy, baǵdarshamnyń qyzyl túsine ótkenderdi, tyıym salynǵan jol jolaǵyn basqandardy, basqa da zań buzýshylyqtardy tirkeıdi.
Buǵan deıin jaýapty basqarma barlyq kamera bıylǵy 1 qarashada iske qosylýy múmkin ekenin aıtqan. Biraq júıelerdi merdiger kompanııa belgili sebeptermen kesh ornatýǵa májbúr bolǵan.
«Beınebaqylaý júıesi boıynsha jobany utyp alǵan «Antarium Group» JShS-dan bólek, aldyndaǵy konkýrsqa taǵy 3 kompanııa qatysqan. Olar konkýrs nátıjelerimen kelispeı, bizdi sotqa berdi. Saldarynan sot isi biraz ýaqytqa ulasyp, Almaty soty jabdyqtardy ornatý jumysyna tyıym salyp qoıdy. Osy jaqynda ǵana sottyń oń sheshimi shyǵarylyp, jumys qaýyrt túrde qaıta jalǵasty. Merdigerdiń jobany kesh tapsyrýynyń óz sebebi bar. Biz kameralardy ornatqany úshin merdigerge aqsha tólemeımiz. Tek servıstik qyzmet kórsetkeni úshin júıe tolyq iske qosylyp jumys isteı bastaǵanda ǵana tóleı bastaımyz. Jalpy, «Antarium Group» JShS-men 3 jylǵa servıstik model boıynsha jalpy somasy 8,5 mlrd teńgege shart jasaldy», deıdi A.Ámirın.
Barlyq beınekamera óńirlik polısııa departamenti men tótenshe jaǵdaılar departamentiniń usynysymen belgili bir kóshe qıylystaryna, kóshe boılaryna ornatylǵan. Olardy qýat kózine qosý kezinde birqatar másele týyndaǵan. Jergilikti energııa taratýshy uıym tehnıkalyq sharttardy kezeń-kezeńimen berip, soǵan oraı búginde keıbir kóshedegi kameralar áli de qýat kózine jalǵanbaǵany anyqtaldy.
«Kameralar men ABK-ni sertıfıkattaý isi áli de jalǵasyp jatyr. Árbir kamera sertıfıkattaýdan ótedi, tekseriledi. Jaýapty komıtetke barlyq kamera jiberilgen, olardy qaraý biraz ýaqytty alady. Aı sońyna deıin beınekameralar tıisti tekserýden ótkizilip, sertıfıkattar beriledi dep kútilip otyr», deıdi basqarma basshysy.
Bılik ókilderi Pavlodar qalasyndaǵy barlyq 240 ABK men qoǵamdyq qaýipsizdikti baqylaýǵa arnalǵan 3 myń beınebaqylaý kamerasy qarasha aıynyń sońynda tolyq iske qosylady dep ýáde etip otyr.
Pavlodar oblysy