Abaı oblysynda drondar óriste baǵýsyz jaıylǵan maldyń jol-kólik oqıǵalaryna sebep bolý faktisin azaıtýǵa kómektesip jatyr.
Búginde eldi meken tóńiregindegi joldardaǵy negizgi máselelerdiń biri maldyń kólik jolyna jaqyn mańda jaıylyp, ári-beri ótýinde bolyp otyr. Ásirese túnde óz aıaǵymen jaıylatyn óristegi iri-qara jol-kólik shyrǵalańyna jıi sebep bolyp, júrgizýshiler men jolaýshylardyń ómirine qaýip tóndiredi.
Abaı oblysynda bul máseleni sheshý úshin zamanaýı tehnologııalar engizile bastady. Aýdan ákimdikteriniń qoldaýymen jergilikti polısııa bólimsheleri patrýldik qyzmeti aýmaqty turaqty baqylaýǵa, avtojol mańynda erkin jaıylyp júrgen maldy jedel anyqtaýǵa múmkindik beretin drondarmen jabdyqtaldy. Joǵary sapaly kamerasy bar ushqynsyz alǵyr apparattar maldyń júrgen jerin anyqtap, naqty ýaqyt rejiminde kórsetip, tez áreket etýge jaǵdaı jasaıdy.
Máselen, Jańasemeı aýdanynda júrgizilgen baqylaý jumysy barysynda 59 bas jylqy anyqtalyp, jol jıeginen alystatylǵan. Mamandardyń aıtýynsha, qaraýsyz júrgen mal Semeı – О́skemen jáne Omby – Maıqapshaǵaı baǵyttaryndaǵy qozǵalysy kóp joldarda jıi kezdesetini baıqaldy. Drondardy qoldaný bul qaýip-qaterdi aıtarlyqtaı tómendetip, óńirdegi jol qaýipsizdigi deńgeıin jaqsartýǵa múmkindik bermek.
Statıstıka da bul jumystyń tıimdiligin rastap otyr. Máselen, jyl basynan beri polısııa qyzmetkerleri maldyń qaraýsyz jaıylýyna qatysty 2 284 quqyq buzýshylyqty anyqtaǵan. Arnaıy aıyp turaqtaryna 9 729 bas mal jetkizilip, olardyń ıeleri «Ákimshilik quqyq buzýshylyq týraly» kodekstiń 408-babymen jaýapkershilikke tartylǵan.
Árıne, bul da – ońaı sharýa emes. Aıaqty maqulyq qaýip-qater degendi qaıdan uqsyn, ot qýalap jaıyla beredi. Ol úshin mal ıesi aıyppul arqalaýy da – daý týdyrmaı turmaıtyn jaıt. Osy rette jańa tehnologııanyń múmkindigin tıimdi paıdaǵa asyrý qaı tarapqa da quba-qup is bolyp otyr.
«Sonymen qatar aýyl sharýashylyǵy janýarlaryn sáıkestendirý talaptarynyń buzylýyna qatysty 201 derek tirkelip, materıaldar veterınarlyq ınspeksııaǵa joldandy. Zamanaýı tehnologııalardy profılaktıkalyq is-qımyldarmen ushtastyrý polısııaǵa oqys oqıǵalardyń aldyn alýǵa ǵana emes, mal ıeleriniń jaýapkershilik mádenıetin arttyrýǵa da múmkindik beredi. Osyndaı keshendi tásil Abaı oblysynyń joldaryn anaǵurlym qaýipsiz etýge óz úlesin qosyp jatyr», deıdi oblystyq polısııa departamentiniń baspasóz qyzmeti.
Abaı oblysy