Qazaqstan velosıped sport federasııasy jyldyń basty jetistikterin, júzege asqan jobalardy jáne 2026 jylǵa josparlanǵan damý baǵyttaryn tanystyrdy. Saltanatty is-sharaǵa sportshylar, jattyqtyrýshylar, memlekettik organdardyń ókilderi men federasııa seriktesteri qatysty, dep jazady Egemen.kz.
2025 jyly Velosport federasııa aıtarlyqtaı aýqymdy jumys atqaryp, el ishinde de, halyqaralyq arenada da joǵary nátıjeler kórsetti. Qazaqstandyq velosportshylar iri halyqaralyq jarystardan 36 medal jeńip aldy. Onyń ishinde 14 altyn, 12 kúmis, 10 qola júlde bar. Malaızııa men Taılandta ótken Azııa chempıonattarynda trek, shosse jáne para-velosport baǵytyndaǵy ulttyq quramalar birneshe márte júldeger atandy.
Jarqyn jetistikterdiń biri – Bahreınde ótken jasóspirimder arasyndaǵy III Azııa oıyndary. Qazaqstannyń jas sportshylary bul jarysta 2 altyn jáne 1 kúmis medal oljalady. Qazaqstan velosıped sporty federasııasynyń prezıdenti Raıymbek Batalov bıyl jyldy eń tabysty maýsymdardyń biri dep atady.
«Velosporttaǵy jetistikterimiz elimizde bolashaq chempıondardyń shooǵyry ósip kele jatqanyn aıqyndady. Maýntınbaık, trek jáne shosse baǵyttarynda jyl boıy elimizdiń ár óńirinde 20 ulttyq chempıonat pen kýbok jarystary ótti. Shymkent, Qostanaı, Taraz, Semeı, Astana jáne Qonaev qalalarynda dúbirli saıystar ótip, qatysýshylar san artty. Bul otandyq velosport tarıhyndaǵy eń qarqyndy jáne mazmundy maýsymdardyń biri boldy», dedi R.Batalov.
Velosport federasııasy bıyl da aýyldyq jerlerdegi sport mektepterin qoldaý baǵdarlamasyn júzege asyrdy. Shalǵaıdaǵy balalar men jasóspirimder sport mekemeleri jańa velosıped bólshekterimen, sporttyq formamen jáne oqý-jattyǵý prosesine qajetti tehnıkalyq jabdyqtarmen tolyqty. Bul bastama aýyl balalarynyń velosportqa qoljetimdiligin arttyryp, talantty jastardyń shyńdalýyna serpin berdi.
Federasııanyń bıylǵy jyly atqarǵan jumysyn Týrızm jáne sport vıse-mınıstri Serik Jarasbaev joǵary baǵalady.
«Elimizde velosport serpindi damýdyń jańa kezeńine kóterildi. Memleket basshysy Úkimetke barlyq jaǵdaı jasap, salany qoldaýdy kúsheıtýdi tapsyrdy. Onyń naqty nátıjesin búginde kórip otyrmyz. Alda áli de atqarar sharýa jeterlik. Kelesi jyly Azııa oıyndary, odan keıin Olımpıadaǵa daıyndyqty bastaımyz. Eger kúsh-jigerimizdi biriktirip, júıeli ázirlik júrgizsek nátıjemiz jaqsarady. Mınıstrlik tarapynan jan-jaqty qoldaý kórsetýge daıynbyz», dedi .
Jyl saıyn beriletin «Altyn dóńgelek» marapaty jasóspirimder sanatyndaǵy jyldyń úzdik sportshysyna buıyrdy. 2009 jyly ómirge kelgen almatylyq Gleb Novıkov osy ataqqa laıyq dep tanyldy. Qazaqstannyń birneshe dúrkin chempıony keleshek Olımpıada dodasynda top jarýdy armandaıdy.
Velosporttan elimizdiń áıelder komandasy UAE Team ADQ-men yntymaqtastyq týraly kelisim jasasty. Bul bastama áıelder velosportynyń jańa kezeńin ashyp, sportshylarǵa halyqaralyq deńgeıde daıyndalýǵa, birlesken jattyǵý baǵdarlamalaryna qatysýǵa jáne álemniń úzdik veloshabandozdarymen tájirıbe almasýǵa múmkindik beredi. Sondaı-aq, 2026 jyly Japonııada ótetin Azııa oıyndaryna daıyndyqty kúsheıtedi.
Saltanatty shara barysynda halyqaralyq dodalarda jeńiske jetken sportshylar túrli nomınasııamen marapattaldy.