Syrtqy ister mınıstrliginiń resmı ókili Aıbek Smadııarov brıfıng barysynda qyzmetinen ketkenin málimdedi. Qyzmetinen ketý sebebin aıtqan joq, dep habarlaıdy Egemen.kz.
«Bul aıaq astynan qabyldanǵan sheshim emes, bul – meniń jeke sheshimim. Segiz jyl boıy osy minberden aqparat berip kelemin… Biz bir komanda bolyp, qysta da, jazda da, ystyqta da, sýyqta da birge jumys istedik. Osy jyldar ishinde elimiz syrtqy saıasatta kóptegen kezeńderden ótti, talaı másele boldy. Al Qazaqstan týraly búkil álemniń habardar bolýy – sizderdiń eńbekterińizdiń arqasy», dedi A.Smadııarov brıfıngte.
Ol sondaı-aq jýrnalısterge jekemenshik kompanııaǵa jumysqa aýysatynyn aıtty.
Smadııarov SIM baspasóz hatshysy qyzmetine 2018 jyly taǵaıyndaldy, bir jyldan keıin Halyqaralyq aqparat komıteti tóraǵasynyń orynbasary boldy, al 2023 jyldyń maýsymynan beri SIM kommýnıkasııalar departamentiniń dırektory qyzmetin atqardy.
2025 jylǵy aqpannan bastap ol Halyqaralyq aqparat komıtetiniń tóraǵasy jáne syrtqy saıası vedomstvonyń resmı ókili qyzmetin atqarǵan.
Buǵan deıin ol SIM júıesinde on jyldan astam jumys istedi, onyń ishinde Qazaqstannyń Vengrııa men Vetnamdaǵy elshilikterinde qyzmet atqarǵan. II sanattaǵy keńesshi dıplomatııalyq dárejesi bar.
Aıbek Smadııarov 1983 jyldyń 7 shildesinde (42 jasta) Almaty qalasynda dúnıege kelgen. Abylaı han atyndaǵy QazHQjÁTÝ-di «qujattanýshy/halyqaralyq qatynastar» mamandyǵy boıynsha támamdaǵan, Qazaqstan men Túrkııa SIM-deriniń biliktilikti arttyrý kýrstarynan ótken. Qazaq, orys, aǵylshyn jáne túrik tilderin jetik meńgergen.
Qyzmettik jyldary ishinde ol «Dıplomatııalyq qyzmetke 25 jyl», «Dıplomatııalyq qyzmetke 30 jyl» medaldarymen, sondaı-aq «Jyldyń úzdik baspasóz hatshysy» jáne «Memlekettik organdar arasyndaǵy úzdik baspasóz qyzmeti» (2022, 2023) tósbelgilerimen marapattalǵan.