Qazaqstanda kepilsiz tutynýshylyq nesıe berý kóleminiń ósýi aıtarlyqtaı baıaýlady, dep jazady Egemen.kz.
2023 jyly bul kórsetkish 27,1% bolsa, 2025 jyldyń on aıynda 13,2%-ǵa deıin tómendedi. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova «Qaryzsyz qoǵam» jobasyn talqylaý barysynda málimdedi.
Agenttik bul nátıjege retteýshiniń birqatar qatań sharanyń arqasynda qol jetkizilgenin atap ótti. Olardyń qatarynda:
Kollektorlarǵa problemalyq nesıelerdi satýǵa moratorıı (2026 jylǵy 1 mamyrǵa deıin); Bankterde 30 kúnnen, mıkroqarjy uıymdarynda 1 kúnnen astam merzimi ótken bereshegi bar azamattarǵa jańa kredıt berýge tyıym salý; Kepilsiz kredıtterdiń eń uzaq merzimin 5 jylmen shekteý.«Qabyldanǵan sharalar bankter tarapynan kepilsiz tutynýshylyq kredıtteýdiń ósýin 2023 jylǵy 27,1% jáne 2024 jylǵy 29,3% deńgeıinen 2025 jyldyń 10 aıynda 13,2%-ǵa deıin báseńdetýge múmkindik berdi», dedi Mádına Ábilqasymova.
Joba aıasynda qaryzyn óteı almaı júrgen azamattarǵa qoldaý sharalary iske asyrylýda. Búginde 703 myń qaryz alýshynyń jalpy somasy 754 mlrd teńge bereshegi retteldi.