Qazaq ádebıeti men mádenıetinde óshpes iz qaldyrǵan kórnekti jazýshy, kúıshi, kınodramatýrg Talasbek Ásemqulovtyń 70 jyldyǵyna oraı Astanadaǵy Roza Baǵlanova atyndaǵy «Qazaqkonsertte» «Taltústegi qońyr kúı» atty ádebı-sazdy eske alý keshi ótti.
Is-sharanyń maqsaty – aıtýly tulǵanyń shyǵarmashylyq murasyn keńinen dáriptep, onyń qazaq rýhanııatyndaǵy erekshe ornyn kópshilikke tereńirek tanytý.
Kesh barysynda qalamgerdiń áıgili «Taltús» romanynda sýrettelgen qońyr kúıler shertilip, atadan balaǵa mıras bolǵan kúı tarıhy aıtyldy. Keshti tizgindegen aqyn Erbol Alshynbaı «Taltús» pen «Táttimbet seri» romandaryndaǵy kúı ańyzdaryn aıtyp, kúıshi, Talasbek Ásemqulovtyń shákirtteri Ardabı Máýlet pen Rústem Núrkenov qońyr áýezdi kúılerdi bappen oryndady. Osylaısha osy kesh arqyly Ketbuǵa, Sarnııaz, Baıjigit, Táttimbet, Aqaı qajy, Júnisbaı jáne T.Ásemqulovtyń avtorlyq kúıleri qaıta jańǵyrdy. Sondaı-aq «Táttimbet seri» romanynda sýretteletin, jaýgershilik zamandaǵy qyz-bozbalanyń qoshtasý sózindeı bolǵan «Sáýlem-aı!» ániniń tarıhy tarqatylyp, jańa nusqasy alǵash ret kópke tanystyryldy. Kesh sońynda jazýshynyń kóptomdyq shyǵarmalar jınaǵynyń 8-tomy jáne kúıshi Rústem Núrkenov daıyndaǵan «Taltústegi qońyr kúı» notalar jınaǵy men Talasbek Ásemqulovtyń «Bektorynyń qazynasy» kitaptarynyń tusaýy kesildi. Ásemqulov álemimen jaqsy tanys, kúıge júregi qulaǵan, bekzat ónerge bas ıgen barsha kórermen úshin bul kesh óte bir aıaýly sáttiń biri boldy desek artyq emes.
Bul is-sharany jazýshynyń jary, mıfolog Zıra Naýryzbaeva jáne qalamgerdiń shákirtteri uıymdastyryp, Talasbek Ásemqulov shyǵarmashylyǵyn taǵy bir qyryn kópshilikke jetkizdi.