AQTО́BE. 11 mamyr. Aqtóbede Qazaqstan Respýblıkasynyń Tuńǵysh Prezıdenti atyndaǵy mádenıet jáne demalys saıabaǵynda oblystyq halyq shyǵarmashylyǵy úıi, sondaı-aq, oblystyq mádenıet, muraǵattar jáne qujattama basqarmasynyń qoldaýymen Uly Jeńistiń 70 jyldyǵyna arnalǵan «Shyrqa syrnaı, áýelep!» atty oblystyq syrnaıshylar festıvali ótti. Bul týraly egemen.kz tilshisi habarlady.
Is-sharanyń maqsaty – óskeleń urpaqqa surapyl soǵystaǵy jaýyngerdiń erligi men batyldyǵyn jetkizý, olardyń ómiriniń qurmetke laıyq ekendigin nasıhattaý jáne elimizdiń tarıhyn bilip, tanýǵa beıimdeý bolyp tabylady.
Festıvaldiń ashylý saltanatyna oblystyq mádenıet, muraǵattar jáne qujattama basqarmasy basshysynyń orynbasary Qydyrǵalı Ermuqan qatysyp, qatysýshylarǵa sáttilik tiledi.
О́ner merekesine jas erekshelikteri 10-65 aralyǵyndaǵy oblystyń Alǵa, Mártók, Temir, Qobda, Áıteke bı, Yrǵyz aýdandarynan jáne Aqtóbe qalasynan 25-ten astam syrnaıshylar qatysty. Sondaı-aq, qalalyq mýzyka mektepteriniń, orta arnaýly oqý oryndarynyń stýdentteri men kásibı jáne áýesqoı mýzykanttary óz ónerlerin ortaǵa saldy.
Saıabaǵynyń sahnasynan soǵys jyldaryndaǵy ándermen qatar áskerı jáne patrıottyq taqyryptaǵy týyndylar shyrqaldy. Merekelik baǵdarlamada jeke oryndaýshylarmen qatar Aqtóbe qalalyq «Geolog» mádenıet úıiniń «Asyl ájeler» halyqtyq ansambli, Alǵa aýdandyq balalar óner mektebiniń orys halyq aspaptar ansambli jáne taǵy basqalary óner kórsetti.
Syrnaıshylar festıvali kórermenderge kóterińki kóńil-kúı syılady Qatysýshy ónerpazdar arnaıy dıplomdar jáne baǵaly syılyqtarmen marapattaldy.
Satybaldy Sáýirbaı.
Derek, sýret: egemen.kz.