QARAǴANDY. 11 mamyr. Qaraǵandyda jan túrshigerlik adam ólimi boldy. Mamyrdyń 9-y kúni qaladaǵy mektepterdiń biriniń aýlasynan bólshektenip tastalǵan jas kelinshektiń denesi salynǵan shabadan tabyldy. Bul týraly «Novyı vestnık» habarlady.
Quqyq qorǵaý organdarynyń qyzmetkerleri bulaısha jantásilim etken áıeldiń kim ekenin tez tapty. Ol qalanyń 25 jastaǵy turǵyn Aıaýly Súleımenova bolyp shyqty.
Munyń aldynda, 6 mamyr kúni týǵan-týystary áleýmettik jeli arqyly onyń joǵalyp ketkeni týraly habarlap, kómekt kórsetýdi suraǵan eken. «Týys qyzymyz joǵalyp ketti. Ony bireýlerdiń qamaýda ustap otyrǵany jóninde málimet bar. Biraq onyń qazir qaı jaqta ekenin jáne ne úshin ustap otyrǵandaryn bilmeımiz. Bizge kómekke kele alatyn erikti kisiler kerek. Kóligi bolsa tipti jaqsy, izdeýge qatysty kez kelgen járdemdi qabyldaımyz», - delingen WhatsApp jelisimen taratylǵan habarlamada.
Kelinshekti ózimen birge páter jaldap turǵan jigit 1995 jylǵy E.A.Traev esimdi jigit sońǵy ret tirideı kórgen delinip otyr. Quqyq qorǵaý organdary qyzmetkerleriniń boljamdary boıynsha, marqumnyń ólimine sebepshi bolǵan da sol bolýy múmkin. Al ólgen qyzdyń týystary ony Aıaýlynyń ólimine qatysy bar dep sanaıdy.
Basylymnyń habarlaýynsha, Súleımenovanyń páterinen óziniń paıyzdyq ústememen qaryzǵa aqsha alǵan adamdarynyń tizimi tabyldy.
Qazir qylmystyq istiń mán-jaıy anyqtalyp jatyr.
Keıbir aqparlarǵa qaraǵanda, Aıaýlynyń artynda kishkentaı uly qalǵan.
Aıqyn Nesipbaı.
Derek, sýret: Novyı vestnık.