ASTANA. 11 mamyr. Aty ańyzǵa aınalǵan rok-ánshi, marqum Vıktor Soıdyń ákesiniń rak aýrýyna shaldyqqany belgili boldy. Bul týraly «Komsomolskaıa pravda» habarlady.
Dárigerler 77 jastaǵy Robert Soıdyń aǵzasynan ádepki kezeńdegi onkologııa aýrýyn tapty. Qazir Robert Maksımovıch Izraıldiń klınıkasynda. Munda ol sáýirdiń sońynan beri hımıterapııadan ótip jatyr. Mýzykanttyń ákesine 11 mamyr kúni kúrdeli operasııa jasaý belgilengen eken. Onyń qalaı ótkeni keıinirek belgili bolady.
«Vıktor Soıdy eske alý» qorynan habarlanǵandaı, Robert Maksmovıchtiń ózi turatyn Peterbýrg qalasynda emdelýi múmkin bolmaǵan. Sebebi, profıldi klınıkaǵa tek jarty jyldan keıin ǵana jatý múmkin bolǵan. Al kelesi klınıkadaǵylar «merekelerden keıin kelý» kerektigin aıtqan.
Robert Soıdyń emdelý úshin tóleıtin 1,8 mln. rýbli bolmaǵan. Mýzykanttyń otbasynda mundaı aqsha joq eken. Sosyn áıeli Marına Han amalsyzdan Vıktor Soı atyndaǵy qordan járdem surapty. Olar osyǵan oraı arnaıy esepshot ashypty. Biraq apta ishinde Vıktordyń tabynýshylary tek 100 myń rýbl ǵana qarjy jınaı alypty.
Birinshi bolyp kómekke Vıktor Soı túsken «Ine» fılminiń rejısseri Rashıd Nýgmanov kelgen. Ol óziniń saıtyna aqsha jınalatyny týraly aqpar ornalastyrǵan. Sodan bastap esepshotqa aqsha túse bastaǵan.
Jetpeıtin qalǵan qomaqty aqshany Robert Maksımovıchtiń jubaıy tanystarynan qaryzǵa alǵan. Tań qalarlyq nárse, mýzykanttyń tabynýshylary men otbasynyń dostarynan bólek, bularǵa járdem beretin eshkim bolmaǵan.
«Nemerem bul habardy salqyn qabyldady, - dep jazady «Vıktor Soıdy eske alý» qorynyń negizin qalaýshy Svetlana Vlasova. – Oǵan, meniń ótinishim boıynsha, Vıtalık Kalgın («Vıktor Soı» kitabynyń avtory – redaksııa) aıtty».
«Valentına Vasılevnamen (Vıktor Soıdyń anasy – redaksııa) da osylaı bolǵan. Ol nemeresimen qatyspaǵan kúıi ketti (2009 jyly qaıtys bolǵan – redaksııa)», - degendi qosty qordyń jetekshisi.
Robert Maksımovıch «Komsomolkaǵa» bergen bir suhbatynda ulynyń qaıtys bolǵannan keıin de ózin asyrap otyrǵanyn aıtqan eken. Ol Vıktordyń dıskileri men atrıbýtıkasyn satýdan jaqsy qalamaqyny alyp turǵan. Alaıda, baıqap qaraǵanda, bul tabystyń ózi operasııa shyǵynyn jaba alatyndaı bolmaǵan sııaqty.
Operasııadan keıin Robert Maksımovıchti Izraılde sáýle alý kýrsy men reablıtasııadan ótý kútip tur. Sondyqtan qarjy jınaý prosesi áli toqtamaǵan kórinedi.
Vıktordyń anasy júregine operasııa jasaýǵa eki kún jetpeı qalypty.
Robert Soı – Qazaqstannyń týmasy. Dáliregi, Qıyr Shyǵystan kelgennen keıin Qyzylorda qalasynda turǵan, osynda jumys istegen, keıin Vıktordyń sońynan Peterbýrgke kóship keledi.
Qaırat Qulymbet.
Derek, sýret: Komsomolskaıa pravda.