Prezıdent Qasym-Jomart Toqaev Qańtar oqıǵasyna qatysqan azamattarǵa baılanysty sot prosesteri men tergeý jumystary jóninde pikir bildirdi. Memleket basshysy bul taqyrypqa qatysty negizgi derekter áldeqashan belgili bolǵanyn aıtyp, keıbir sot isteri men urlanǵan qarýdy izdestirý jumystary áli de jalǵasyp jatqanyn málimdedi, dep habarlaıdy Egemen.kz.
Prezıdent Qasym-Jomart Toqaevtyń aıtýynsha, Qańtar oqıǵasyna baılanysty tergeý barysynda quqyq qorǵaý organdary azamattyq qoǵam ókilderimen tyǵyz baılanysta jumys istegen. Birqatar qoǵamdyq komıssııalar qurylyp, olarǵa bedeldi zańgerler jetekshilik etken. Bul tergeýdiń beıtarap ári ádil júrgizilýine múmkindik bergen.
«Osy oraıda, azamattyq jaýapkershilik tanytyp, kásibı biliktiligin kórsetkeni úshin olarǵa rızashylyǵymdy bildirgim keledi», dedi Memleket basshysy.
Prezıdent 2022 jylǵy naýryz aıynda Parlamentte arnaıy qoǵamdyq tyńdaý ótip, Qańtar oqıǵasyna jáne eldiń konstıtýsııalyq qurylymyn buzýǵa baǵyttalǵan áreketterge jan-jaqty baǵa berilgenin eske saldy.
«Iá, keıbir sot prosesteri, sondaı-aq, qańtarda urlanǵan kóptegen qarýdy izdestirý jumystary áli jalǵasyp jatyr. Sol kúnderi qylmyskerler úsh myńnan astam qarý-jaraqty ıemdenip ketken edi. Biraq kúshtik qurylymdardyń arqasynda qarý-jaraq jasyrylǵan qoımalardyń kóbi tabyldy», dedi Qasym-Jomart Toqaev.
Prezıdent Qańtar oqıǵasyn talqylaý kezinde onyń túpki sebepteri men aýqymyn túsinýdiń mańyzyn atap ótti. Onyń aıtýynsha, tártipsizdik bir ǵana qalada emes, bir mezette on eki qalada uıymdastyrylǵan. Nátıjesinde oblys ákimdikteri men quqyq qorǵaý organdarynyń ǵımarattary basyp alynyp, memleket úshin asa qaýipti jaǵdaı qalyptasty.
«Tóńkeris» jasaýǵa ábden mashyqtanǵan mamandardyń jetekshiligimen tártipsizdikti uıymdastyrýshylar Úkimettiń janar-jaǵarmaı baǵasyn ósirý týraly sheshimin jeleý etip, adamdardy jappaı sherýge shyǵýǵa ıtermeledi. Sosyn azamattardyń, memlekettik qyzmetshilerdiń, bir tańǵalarlyǵy, kúshtik qurylym qyzmetkerleriniń edáýir bóliginiń arasynda dúrbeleń týǵyzdy. Olar qarý-jaraq pen qupııa qujattardy qaraýsyz qaldyryp, jumys oryndaryn tastap, kete bastady. Ulttyq qaýipsizdik komıtetiniń jáne Ishki ister mınıstrliginiń keıbir basshylary syn saǵatta Otan aldyndaǵy adaldyǵyn saqtap qala almady, kásibı deńgeıi de tómen ekenin kórsetti», dedi Qasym-Jomart Toqaev.
Memleket basshysy sol kezeńde Ulttyq qaýipsizdik komıteti men Ishki ister mınıstrliginiń keıbir basshylary kásibı álsizdik tanytyp, Otan aldyndaǵy jaýapkershiligin saqtaı almaǵanyn da atap ótti.
Ásirese Almaty qalasynda jaǵdaıdyń asa kúrdeli bolǵanyn aıtqan Prezıdent áskerı qyzmetshiler men beıbit turǵyndardyń japa shekkenin, ákimshilik ǵımarattar men bıznes nysandarynyń qırap, tonalǵanyn jetkizdi. Osyndaı jaǵdaıda tótenshe sharalar qabyldaý qajettigi týyndaǵan.