Jyl basyndaǵy dástúrli suhbatynda Memleket basshysy Qasym-Jomart Toqaev ótkendi qorytyndylap, bolashaq basymdyqtardy belgileıdi. Bul memleketimizde jańa saıası tájirıbeni qalyptastyryp keledi. 2026 jyl da osy dástúrmen bastaldy. 5 qańtarda «Turkistan» gazetindegi aýqymdy suhbatynda Prezıdent ishki jáne syrtqy saıasat, eldiń áleýmettik-ekonomıkalyq damýy, onyń ishinde ınflıasııa, salyq reformasy, olıgopolııalarmen kúres, parlamenttik reforma sııaqty ózekti taqyryptarǵa qatysty suraqtarǵa jaýap berdi.
Prezıdent elimizdiń reformalardy júzege asyrýǵa birjola bet burǵanyn, jańǵyrý jolynda qaryshty qadam basyp, barynsha órkenıetti el bola bastaǵanyn, qoǵamda óskeleń urpaqtyń jarqyn bolashaǵy úshin túbegeıli ózgeris jasaýdyń mańyzy týraly naqty túsinik qalyptasqanyn, sonymen qatar bolashaq úshin tynymsyz eńbektenip, tek alǵa umtylý keregin atap ótti.
Ádildik, zań men tártip, eńbekqorlyq sııaqty memleketimizdiń bolashaǵy úshin aıryqsha mańyzdy qaǵıdattarǵa negizdelgen qoǵam quryp jatyrmyz. Q.Toqaev uzaq merzimge arnalǵan nátıjege jetý úshin bul jumys jańa jylda eki ese tyń qarqynmen jalǵasyn tabatynyna senim bildirdi.
Prezıdent jurt nazarynda júrgen salyq reformasyna da toqtaldy. О́z jaýabynda «Bul reforma qatardaǵy «fıskaldyq naýqan» emes, salyq júıesin qaıta júkteý ekenin, salyq reformasynyń basty mindeti turaqty ekonomıkalyq ósýdi qamtamasyz etý jáne onyń nátıjesin bıyl kóremiz», dep jaýap berdi.
Suhbatta tamyry tereńge ketken ekonomıkalyq máselelerge ondaǵan jyldar boıy nazar aýdarylmaǵany, qalalar men aýyldardaǵy ınfraqurylymnyń tozǵany, energetıka nysandary men kommýnaldyq jelilerdiń eskirgeni kóterildi. Tozyǵy jetip, áýpirimmen áreń turǵan ınfraqurylymdy qalpyna keltirý jetkiliksizdigi, jumys tásilin ózgertý, ol úshin salaǵa ınvestısııa tartý úshin qolaıly jaǵdaı jasap, naǵyz naryqtyq tetikter qalyptastyrý jumystary júrgizilip jatqany ataldy.
Memleketimizdiń damýy úshin kólik jáne logıstıka salasynyń jaǵdaıyna da nazar aýdaryldy. Qazaqstannyń teńizge tikeleı shyǵatyn joly bolmasa da, Eýrazııanyń negizgi tranzıttik kúre joldar toǵysqan jerinde ornalasqanyn durys paıdalaný qolǵa alynbaq. Sondyqtan elimizdi Eýrazııanyń kólik aılaǵy retinde qalyptastyrýdy josparlap, ol úshin kólik jáne logıstıka máselesi geosaıasattyń ajyramas bóligine aınalatyny aıtyldy.
Aýyl sharýashylyǵy salasynyń áleýetin durys paıdalaný máselesi de aıtyldy. Prezıdenttiń aıtýynsha, sapalyq turǵydan damytý úshin jasalyp jatqan jumystarǵa, sonyń arqasynda qol jetkizgen jetistikterge qaramastan bul salada qazirgi tańda kooperatıvterge, ıaǵnı sharýalar birlestigin qurýǵa qaıta oralý máselesi qarastyrylyp jatyr. Kooperatıvter eńbek ónimdiligi men aýyl sharýashylyǵy óndirisiniń tıimdiligin arttyra alady. Sondaı-aq daıyn ónimdi satatyn naryqtarǵa jaqyn bolýǵa, tutynýshylarmen uzaq merzimge arnalǵan qarym-qatynas ornatýǵa jol ashady.
Suhbatta Prezıdent el jastaryna úndeý joldap, daryndy, bilimdi, yntaly jastarǵa degen senimin bildirip, olardy jasampazdyqqa, syndarly oılaýǵa, eńbekqorlyqqa, izdenimpazdyq pen tártipke shaqyryp, nemquraıdylyq pen nıgılızmnen, sondaı-aq bóten ıdeıalardan saq bolýǵa shaqyrdy.
Bul Memleket basshysy Q.Toqaevtyń halyqshyl beınesin kórsetetin ashyq ári tereń mazmundy, elimizdiń bolashaq strategııalyq damýynyń basym baǵyttaryn aıqyndaǵan suhbat boldy dep esepteımin.
Álı BEKTAEV,
Senat depýtaty