Almaty qalasynda polıseıler esirtki quraldarynyń zańsyz aınalymyna qatysy bar degen kúdikpen birneshe adamdy ustaǵan. «Quqyqtyq tártip» jedel-profılaktıkalyq is-sharasy sheńberinde ustalǵandardyń biri sheteldik azamat bolyp shyqty, dep jazady Egemen.kz.
Tintý barysynda shetel azamatynan untaq tárizdi zat salynǵan birneshe oram tabylǵan. Tárkilengen zattardyń tyıym salynǵan esirtki quraldary ekeni saraptama qorytyndysynda málim boldy.
Sondaı-aq medısınalyq kýálandyrý nátıjesinde kúdiktiniń psıhoaktıvti zattardy tutynǵany anyqtaldy. Materıaldar sotqa deıingi tergep-tekserý tártibimen tirkelip otyr. Barlyq mán-jaı anyqtalyp jatyr.
Oǵan qosa kúdiktiniń «jasyryn qoıma» tásili arqyly júzege asyrylatyn yqtımal kýrerlik qyzmetke qatystylyǵy tekseriledi.
«Biz esirtki taratýdyń joldaryn júıeli túrde anyqtap, kýrerlik jelilerge tartylǵan tulǵalardy áshkereleý jumystaryn turaqty túrde júrgizip kelemiz. Mundaı jedel is-sharalar úzdiksiz ótkiziledi jáne árbir anyqtalǵan derekke quqyqtyq baǵa beriledi», dedi Almaty qalasy PD esirtki qylmysyna qarsy is-qımyl basqarmasynyń bastyǵy Murat Jumabaev.