Aýrýhanaishilik ınfeksııalar (AII) – densaýlyq saqtaý júıesindegi ózekti máselelerdiń biri. Infeksııalar pasıentterdiń em alý merzimin uzartýǵa, asqynýlardyń damýyna, medısınalyq kómek sapasynyń tómendeýine ákelip soǵady. Osy oraıda oblystardaǵy medısınalyq stasıonarlarda AII-diń aldyn alý máselesi erekshe mańyzǵa ıe, sanıtarlyq baqylaý bul baǵyttaǵy negizgi quraldardyń biri.
Sanıtarlyq baqylaý medısınalyq uıymdarda sanıtarlyq-epıdemıologııalyq salamattylyqty qamtamasyz etýge baǵyttalǵan uıymdastyrýshylyq, profılaktıkalyq, qadaǵalaý sharalarynyń keshenin qamtıdy. Negizgi maqsaty – pasıentter men medısına qyzmetkerleri arasynda juqpaly aýrýlardyń paıda bolýy men taralýynyń aldyn alý.
Medısınalyq stasıonarlarda sanıtarlyq-gıgıenalyq, epıdemııaǵa qarsy rejimniń saqtalýyn qamtamasyz etý – sanıtarlyq baqylaýdyń mańyzdy baǵyty. Úı-jaılardy belgilengen talaptarǵa sáıkes tazalaý, aǵymdaǵy, jalpy dezınfeksııalaý jumystaryn ýaqtyly júrgizý, operasııalyq, prosedýralyq bólmeler men palatalardyń sanıtarlyq jaǵdaıyn baqylaý ınfeksııalyq qaýipterdiń tómendeýine yqpal etedi.
Medısınalyq maqsattaǵy buıymdardy dezınfeksııalaý, sterılızasııalaý talaptarynyń saqtalýy sanıtarlyq baqylaýdyń basym baǵyttarynyń biri. Bul úderisterdiń buzylýy ınfeksııalyq asqynýlardyń paıda bolýyna, antıbıotıkterge tózimdi mıkroorganızmderdiń taralýyna sebep bolýy múmkin. Osy turǵyda sanıtarlyq dárigerler sterılızasııalaý rejimderiniń saqtalýyna, óńdeý sapasyna, sterıldi buıymdardy saqtaý sharttaryna, eseptik qujattamanyń durys júrgizilýine baqylaý júrgizedi.
AII-diń paıda bolý qaýpi joǵary bólimshelerge, atap aıtqanda, hırýrgııalyq, reanımasııalyq, akýsherlik-gınekologııalyq, neonatologııalyq, ınfeksııalyq bólimshelerge sanıtarlyq baqylaý kúsheıtilgen túrde júzege asyrylady. Bul bólimshelerde talaptardyń saqtalýyna júıeli monıtorıng júrgiziledi, epıdemıologııalyq jaǵdaı taldanyp, profılaktıkalyq sharalar der kezinde qabyldanady.
Stasıonarlarda qorshaǵan ortanyń sanıtarlyq jaı-kúıin baqylaý da mańyzdy. Aýyzsý sapasy, jeldetý, aýa almastyrý júıeleriniń jaǵdaıy, mıkroklımat kórsetkishteri medısınalyq uıymdardyń epıdemıologııalyq qaýipsizdigine tikeleı áser etedi. Sanıtarlyq baqylaý atalǵan kórsetkishterdiń qoldanystaǵy normalar men talaptarǵa sáıkestigin qamtamasyz etedi.
Medısınalyq qaldyqtarmen jumys isteý tártibin saqtaý sanıtarlyq baqylaýdyń mańyzdy quramdas bóligi. Qaldyqtardy jınaý, saqtaý, tasymaldaý, zalalsyzdandyrý talaptarynyń buzylýy ınfeksııalardyń taralý qaýpin arttyrady. Sanıtarlyq baqylaý medısınalyq qaldyqtarmen qaýipsiz jumys isteý talaptarynyń oryndalýyn qamtamasyz etýge baǵyttalady. Sonymen qatar medısına qyzmetkerlerimen sanıtarlyq-aǵartý, profılaktıkalyq jumystar júrgiziledi. Qol gıgıenasyn saqtaý, jeke qorǵanysh quraldaryn durys paıdalaný, aseptıka, antıseptıka qaǵıdalaryn oryndaý jónindegi turaqty daǵdylardy qalyptastyrý AII-diń aldyn alýda mańyzdy ról atqarady.
Bir sózben, óńirlerdegi medısınalyq stasıonarlarda sanıtarlyq baqylaý AII-diń aldyn alý júıesiniń ajyramas bóligi. Onyń tıimdi uıymdastyrylýy medısınalyq kómektiń sapasy men qaýipsizdigin arttyrýǵa, pasıentter men medısına qyzmetkerleriniń densaýlyǵyn qorǵaýǵa, sondaı-aq halyqtyń densaýlyq saqtaý júıesine degen senimin nyǵaıtýǵa yqpal etedi.
Gúlnar MADIMAROVA,
Almaty qalasy Almaly aýdanynyń SEBB bas mamany