Prezıdenttiń «Turkistan» gazetinde jarııalanǵan suhbatynda sıfrlandyrýǵa erekshe ekpin berilgeni qýantty. 2026 jyl – Sıfrlandyrý jáne jasandy ıntellekt jyly dep jarııalanǵany biraz nárseni ańǵartqandaı.
Bul rette Elektrondyq qarjy ortalyǵynda jasandy zerdeni damytýǵa udaıy kóńil bólinip kele jatqanyn aıta keteıin. Qolǵa alynǵan perspektıvaly sheshimderdiń biri – JI bıznes-kómekshi jobasy. Atalǵan qural barlyq kezeńde kásipkerlerge qoldaý kórsetýge arnalǵan. Máselen, bıznestiń ıdeıa satysynan bastap ony naqty júzege asyrýǵa deıin.
Ozyq júıede qarastyrylatyn negizgi fýnksıonaldardyń biri – bolashaq kásipke arnalǵan utymdy oryndy tańdaý. Tıimdi tańdalǵan jer – bıznestiń tabysty bolýyndaǵy mańyzdy faktor: bul satý deńgeıin, básekege qabiletti ortany jáne bolashaq operasııalyq shyǵyndardy anyqtaıdy.
JI-kómekshisi memlekettik aqparattyq resýrstarmen ıntegrasııalanǵan jáne senimdi derekterdiń aýqymdy jıyntyǵyn taldaýǵa qaýqarly: aýdandardyń ekonomıkalyq belsendiligi, suranys qurylymy, jumyspen qamtý deńgeıi, básekelestik orta, salalardyń damý serpini. Osy málimetterge súıene otyryp, tıisti algorıtmder kózdelgen kiris mólsherin, rentabeldikti jáne táýekelderdi boljap, ár lokasııaǵa daıyn usynystar jasaı alady.
Atalǵan tetikti paıdalaný qabyldanatyn sheshimderdiń sapasyn edáýir jaqsartyp, bastapqy kezeńdegi qatelikterden saqtanýǵa kómektesedi jáne ShOB derekterge baǵdarlanǵan tásildiń jańa standartyn qalyptastyrady.
Sıfrly jańǵyrtýdyń kelesi kezeńi proaktıvti qyzmetti jolǵa qoıýmen baılanysty. Málimetterdiń jınaqtalýyna baılanysty memlekettik júıeler kásipkerlerdiń qajettilikterin avtomatty túrde anyqtap, olarǵa tıisti memlekettik qoldaý sharalaryn, jeńildetilgen baǵdarlamalar men mańyzdy habarlamalardy usynady. Demek, isker azamat qajetti qyzmetti izdep áýre bolmaıdy, kerisinshe «qyzmet paıdalanýshyny ózi tabady» modeline basymdyq beriledi.
Memlekettik servısterdi ıntegrasııalaý, Biryńǵaı jeke kabınetti qurý men JI sheshimderin damytý – ozyq sıfrly ekojúıeni qalyptastyrýǵa jol ashady. Osy arqyly memlekettik organdarmen ózara is-qımyl tıimdi, jyldam jáne tehnologııalyq turǵydan alǵanda, zamanǵa saı bolady. О́z kezeginde kásipkerler senimdi jáne ornyqty ósimge múmkindik beretin tyń tetikke qol jetkizedi.
Dııas KRAMShEEV,
Elektrondyq qarjy ortalyǵynyń basqarma tóraǵasy