Ál-Farabı atyndaǵy Qazaq ulttyq ýnıversıtetindegi oqý korpýstary men jataqhanalardyń shatyrlary ınvestor esebinen jańartylyp, kún panelderi ornatyldy.
Jańǵyrtý jumystary barysynda shatyrlardaǵy tozyǵy jetken eski jabyndylar tolyq alynyp, qurylys talaptaryna saı tegisteý jumystary júrgizildi. Qoqystar shyǵarylyp, qara qaǵaz tóseldi. Jańartylǵan sýaǵar júıeleri ornatylyp, jaýyn-shashynǵa qarsy qorǵanys kúsheıtildi.
Eń bastysy, quny 1 mlrd teńge kólemindegi joba ýnıversıtet bıýdjetine salmaq salmaı, ınvestordyń qoldaýymen júzege asyryldy.
Jalpy, 2024 jyldyń qorytyndysy boıynsha ýnıversıtettiń elektr energııasyn tutyný kólemi 9,17 mln kVt/saǵ-ty quraǵan. Al qýaty 994 kVt bolatyn 1 390 kún paneli jylyna 3,39 mln kVt/saǵ elektr energııasyn óndiredi. Bul da óz kezeginde QazUÝ-dyń energııaǵa qajettiliginiń 35%-yn qamtamasyz etýge múmkindik beredi. Sonymen qatar 20 myń sharshy metr aýmaqty alyp jatqan kún panelderiniń arqasynda ýnıversıtet jyl saıyn 111 mln teńgeden astam qarajatty únemdeıdi. Qazir ekonomıka jáne bıznes joǵary mektebi, jýrnalıstıka, zań, tarıh, geografııa jáne tabıǵatty paıdalaný, bıologııa jáne bıotehnologııa, medısına jáne densaýlyq saqtaý, fılologııa fakýltetteriniń ǵımarattaryn, sonymen birge birqatar stýdent úıin kún panelderimen jabdyqtaý aıaqtaldy.
Mamandardyń aıtýynsha, jabdyqtardyń qyzmet etý merzimi eskerilgen jaǵdaıda, ótelý kezeńinen keıingi 20 jylda jobanyń jalpy ekonomıkalyq tıimdiligi 2 mlrd teńgeden asady. Bul jobanyń uzaqmerzimdi ári ekonomıkalyq turǵydan tıimdi ekenin kórsetedi.
Jyl saıyn ýnıversıtet bazasynda ǵylymı ortalyqtar, zerthanalar qarqynmen ashylyp jatyr. 2030 jylǵa qaraı QazUÝ-dyń elektr energııaǵa degen suranysy eki esege artyp, 18 mln kVt/saǵ-tan asady dep boljanǵan. Osy turǵyda kún panelderi arqyly oqý ordasynyń elektr energııasyna qajettiliginiń bir bóligi balamaly kózder arqyly qamtamasyz etilmek.
Bul stýdentter men qyzmetkerlerge turaqty, ekologııalyq taza energııany paıdalanýǵa múmkindik beredi, sondaı-aq ýnıversıtettiń ınnovasııalyq ımıdjin nyǵaıtady. Josparǵa sáıkes bolashaqta QazUÝ qalashyǵyndaǵy barlyq fakýltet pen jataqhana kún panelderimen kezeń-kezeńimen qamtamasyz etiledi.