О́rnek aýylynyń tusynan ótken saıyn Oralhan Bókeıdiń «Qasqyr ulyǵan túnde» áńgimesi oıǵa oralady. Taý bókterindegi aýylǵa jalǵyz aıaq soqpaqpen burymy qar syzyp, Araı ketip bara jatqandaı kórinedi...
Kúre joldan úsh shaqyrym jerdegi aýyldan sol baıaǵy toqsanynshy jyldary turǵyndary údere kóshken. Qazir aınalasy on shaqty úı otyr. Tirshilik kózi – tórt túlik. Byltyrlary ǵana týrızm túren sala bastady. Áıtpese eleýsiz aýyldyń áleýeti quldyraı bergen. Oralhan da О́rnekti О́rken dep alyp, qasqyrǵa jem bolǵan qyz arqyly aýyldyń jaı-japsary, jaǵdaıyn kórsetkisi kelse kerek. Malshylardyń aýylyna avtobýstyń burylmaıtynyn astarlaı jetkizip, arǵy jaǵyndaǵy Novostroıkany asfalty bar aýyl retinde sýrettegen. Shyndyq sol edi. Onyń ústine, asfaltty aýyldyń shoshqasy da kóp-tuǵyn. Issaparǵa shyqqan jýrnalıst jigit te sol aýyl týraly jazbaq. Iá, bir kezderi problemaǵa kóz juma qarap, órge basqan aýyldardy ǵana jazýǵa qushtar edi ǵoı. Áńgimedegi qyzdyń qasqyrǵa jem bolǵany týraly epızod ómirde bolǵan. Alaıda, dál osy tusta emes kórinedi. Jazýshy sol oqıǵanyń aınalasynda astarlap oıyn jetkizgisi keldi. Jetkizdi de.
Shyǵarmany oqyp otyrsańyz, jýrnalıst jigit baǵyt alǵan aýdan Úlgili dep atalady. Keńestik uranmen qoıylǵan ataý. «Tegi, men baǵyt alǵan Úlgili aýdannyń basshylary ispetti. Ústerinde qundyz jaǵaly qys palto, keıbireýinde ádemilep syryp tikken sholaq ton, bastarynda úkilegen tıin qulaqshyn, aıaqtarynda appaq pıma, betteri qyp-qyzyl, býy burqyrap, qarq-qarq kúlip otyr...» degen joldary bar. Al endi astaryna úńilińiz. Malmen kúneltken aýyl, qarq-qarq kúlgen basshy. Áńgimede avtor bastaýysh qana mektebi bar aýyldyń balalary Novostroıkaǵa baryp oqıtynyn dıalogke engizgen (áli kúnge solaı).
«Men oıladym» dep jalǵaıdy jazýshy áńgimesin. «О́mir degen ǵajap deıdi, túk te ǵajap emes, ánsheıin osyndaı avtobýsqa minip, belgili bir aıaldamadan túsip qalý, bireýdiń toıyp sekirýi, bireýdiń tońyp sekirýi. Áldekimder kórer tańdy kózimen atqyzyp, oı qajap uıyqtamaıdy; áldekimder ishigine tars búrkenip ýaıymsyz toq uıqyǵa basady. Saıyp kelgende, ómir degenimiz – ózgeniń baqytyna qyzyǵyp ótý ǵana...». Iá, oqyrmanǵa oı sala otyryp jazylǵan shaǵyn áńgimesin bir demde oqısyz. О́kinishtisi, tragedııamen aıaqtalady. Jalpy, tabıǵaty qatal óńirdiń tragedııasy da kóp bolǵan. Anaý álgi Kókkóldiń ózi nege turarlyq?!
Bárin qoıshy. Oralhan tirilip kelse, tymaǵyn kókke atyp qýanar edi. Avtobýs burylmaıdy degen О́rnekke erteń ushaq qonady. Aýyldyń dál irgesine halyqaralyq áýejaı salynyp jatyr. Kúre joldy da aýylǵa taqatty. Bul – jazýshy armanynyń oryndalǵany der edik. Erteń-aq Novostroıka dep jazǵan Belqaraǵaı aýyly men О́rnegi órkendeıdi. Kezinde qala jaǵalaǵan О́rnektiń turǵyndary qaıtadan aýylǵa bet burǵan. Jer alyp, kásip ashýǵa nıettengen. Mine, Oralhan Bókeıdiń keńes kezinde kótergen máselesi búgin sheshilip jatyr. «Qasqyr ulyǵan túndeden» túıgen oı osy.