Elimizde resmı túrde ınjenerııa men joǵary tehnologııalar salasyndaǵy álemdegi eń iri kásibı uıym – Elektrtehnıka jáne elektronıka ınjenerleri ınstıtýtynyń (IEEE) óńirlik bólimshesi quryldy. Ǵylym jáne joǵar bilim mınıstrligi málimdegendeı, bul ınjenerlik jáne sıfrlyq ınnovasııalardy damytýǵa arnalǵan jańa platforma bolmaq.
Mańyzdy bastamanyń júzege asýyna Astana IT University ári Halyqaralyq aqparattyq tehnologııalar ýnıversıteti eleýli úles qosty. Atalǵan ýnıversıtetter «IEEE» qyzmetin damytýǵa arnalǵan negizgi alańdardyń biri retinde tanylyp otyr. Aıta keteıik, «IEEE» búginde álemniń 190-nan astam elinde 500 myńnan asa mamandy biriktiredi. Elimizde resmı seksııanyń ashylýy eldiń jahandyq ǵylymı-tehnologııalyq keńistiktegi róliniń artyp kele jatqanyn kórsetedi.Sondaı-aq Astana IT University-diń ınjenerlik bilim men sıfrlyq ınnovasııalardyń jetekshi ortalyǵy retindegi mártebesin nyǵaıta túsedi.
Osy oraıda «IEEE Kazakhstan Section» tóraǵasy, Astana IT University professory Dıdar Edilhan: «IEEE Kazakhstan Section qazaqstandyq ınjenerler men zertteýshilerge IEEE-diń jahandyq saraptamasyna, halyqaralyq kásibı qaýymdastyqtarǵa, ozyq tehnologııalyq tájirıbelerge tikeleı jol ashady. Bizdiń maqsatymyz – ınjenerlik talanttardy damytýǵa, ǵylymı yntymaqtastyq pen ınnovasııalarǵa negizdelgen turaqty platforma qalyptastyrý. Bul ekojúıeniń negizgi qozǵaýshy kúshteriniń biri Astana IT University bolmaq», dedi.
Jańa seksııa elektrtehnıka jáne elektronıka, aqparattyq tehnologııalar men kompıýterlik ǵylymdar, jasandy ıntellekt jáne derekterdi taldaý, telekommýnıkasııa jáne kıberqaýipsizdik, robottehnıka jáne sabaqtas ınjenerlik salalar sııaqty negizgi baǵyttardaǵy mamandardy biriktiredi. «IEEE Kazakhstan Section» kásibı ortany damytýǵa, ǵylymı zertteýlerdi qoldaýǵa, halyqaralyq konferensııalar men semınarlar ótkizýge, bilim berý baǵdarlamalaryn uıymdastyrýǵa jáne otandyq ǵalymdardy IEEE jahandyq bastamalaryna tartýǵa yqpal etedi.
Seksııa qyzmetinde «IEEE International Conference on Smart Information Systems and Technologies» (IEEE SIST) halyqaralyq konferensııasy aıryqsha oryn alady. Bul forým jyl saıyn Astana IT University bazasynda ótkiziledi.
Astana IT University ǵylym jáne ınnovasııalar prorektory Andreı Beloshıskıı: «Ýnıversıtetimiz bes jyldan astam ýaqyt boıy «IEEE SIST» konferensııasynyń uıymdastyrýshysy retinde qyzmet atqaryp keledi. Bul alańda ǵalymdar, ınnovatorlar men ındýstrııa mamandary jasandy ıntellekt, ıntellektýaldy júıeler, úlken derekterdi óńdeý jáne sıfrlyq servıster salasyndaǵy qoldanbaly sheshimderdi talqylaıdy. Konferensııa baǵdarlamasy zertteý nátıjeleriniń tanystyrylymdaryn, tehnıkalyq sessııalardy, sheberlik sabaqtarymen óndiris seriktesterimen kezdesýlerdi qamtıdy. «IEEE Kazakhstan Section»-nyń qurylýy qatysýshylarǵa birlesken zertteýler júrgizýge jáne «IEEE» halyqaralyq jumys toptaryna qosylýǵa jańa múmkindikter beredi», dedi.