Byltyr elimizde jumyspen qamtýǵa járdemdesýdiń belsendi sharalaryna 306,2 myń adam tartyldy. 912,8 myń azamat jumysqa ornalasty. Jumysqa ornalastyrýdyń túrli baǵyttary bar.
Eńbek jáne halyqty áleýmettik qorǵaý mınıstrliginiń málimetinshe, 2025 jyly sýbsıdııalanatyn jumys oryndaryna 171,8 myń adam ornalasqan. Áleýmettik jumys oryndarynda 13,5 myń, jastar praktıkasynda 30,6 myń, qoǵamdyq jumystarda 100,8 myń, «Kúmis jas» jobasy aıasynda 19,4 myń, «Alǵashqy jumys orny» jobasymen 7,1 myń, «Urpaqtar kelisimsharty» jobasy sheńberinde 335 adam jumyspen qamtyldy.
Azamattardyń ál-aýqatyn nyǵaıtý maqsatymen, jańa bıznes-bastamalardy júzege asyrý úshin halyqtyń áleýmettik osal sanatyna jatatyn kásip ashýshylarǵa 400 AEK-ke deıin (1 572 800 teńge) 9 239 grant berildi. Eńbek naryǵyndaǵy suranysqa ıe daǵdylardy onlaın oqytýmen 63,5 myń jumyssyz qamtylsa, onyń 56,6 myńy oqýdy aıaqtap, sertıfıkat aldy. «Bastaý bıznes» jobasy aıasynda kásipkerlik negizderine oqytýmen 52 myń adam qamtyldy, onyń ishinde 29,3 myń adam kásipkerlikke baýlıtyn kýrsty aıaqtady.
Jumys berýshilerdiń ótinishimen kásiptik oqytýǵa 9 734 adam jiberilip, oqýyn aıaqtaǵan 8 535 adamnyń 7 442-i jumysqa ornalasty. Sondaı-aq qyzmet salasyn tańdaý maqsatynda 387 myń adam áleýmettik kásiptik baǵdarlaýdan ótip, keńes berý qyzmetterine júgingen.
Osylaısha, byltyr 912,8 myń adam jumysqa ornalastyryldy, onyń ishinde: halyqty jumyspen qamtýǵa járdemdesýdiń belsendi sharalary sheńberinde 181 myń, elektrondyq eńbek bırjasynda jumys berýshiler ornalastyrǵan bos jumys oryndaryna 254,1 myń, Memleket basshysynyń «10 myń turǵynǵa 100 jumys orny» bastamasy sheńberinde 434 myń, ortalyq memlekettik organdar iske asyratyn jobalarmen 43,7 myń adam jumyspen qamtyldy.