Memleket basshysy Qasym-Jomart Toqaevtyń Ulttyq Quryltaıdyń besinshi otyrysynda sóılegen sózi eldiń damýyna qatysty mańyzdy baǵdarlardy aıqyndap berdi. Sonyń ishinde Prezıdenttiń Abaı ilimine, patrıotızm men jańa dáýir talaptaryna beıimdelý máselelerine tereń toqtalýy búgingi bilim berý júıesi úshin asa ózekti dep sanaımyn.
Abaıdyń «Tolyq adam» ilimi men qazirgi «Adal azamat» tujyrymdamasynyń ózara sabaqtastyǵy jas urpaq tárbıesinde temirqazyq bolýy tıis qundylyqtar. Abaı, Ál-Farabı, Qoja Ahmet Iаsaýı syndy uly oıshyldardyń murasy – halqymyzdyń rýhanı-fılosofııalyq negizi. Bul ilimderdi tek mereıtoılar qarsańynda ǵana emes, kúndelikti bilim jáne ǵylym salasynda tárbıe jumystarynyń ózegine aınaldyrý – bizdiń ortaq mindetimiz. Osy oraıda Ońtústik Qazaqstan medısına akademııasynda Abaı ilimin, ulttyq qundylyqtardy bilim alýshylar arasynda keńinen nasıhattaýǵa baǵyttalǵan ǵylymı-tanymdyq kezdesýler, tárbıelik is-sharalar turaqty túrde turaqty túrde ótkizilip kele jatqanyn aıta ketkim keledi.
Sonymen qatar, Memleket basshysynyń memlekettik rámizderge degen qurmet pen jaýapkershilik týraly aıtqan oılary da erekshe mańyzǵa ıe. Kók Tý – táýelsizdigimizdiń, birligimizdiń, eldik rýhymyzdyń aıqyn belgisi. Prezıdent atap ótkendeı, memlekettik rámizderdi qadirleý – formaldy talap emes, bul ár azamattyń ishki mádenıeti men otanshyldyq seziminiń kórinisi. Biz bul ustanymmen tolyq kelisemiz. Akademııamyzdyń bilim alýshylary búginde shetelderde bilimin jetildirip qana qoımaı, halyqaralyq olımpıadalar men baıqaýlarda, ǵylymı saıystarda Qazaqstannyń kók Týyn jelbiretip, el abyroıyn asqaqtatyp júr. Bul – biz úshin úlken maqtanysh.
Prezıdenttiń sıfrlandyrý, jasandy ıntellekt jáne adam kapıtaly týraly aıtqan oılary da qazirgi zamannyń naqty talaptaryna jaýap beredi. Biz óte kúrdeli, biraq múmkindigi mol kezeńge qadam bastyq. Bilim men ǵylymǵa, joǵary tehnologııalarǵa salynǵan ınvestısııa – eldiń erteńine salynǵan ınvestısııa. Ásirese, medısına salasynda sıfrlyq tehnologııalar men jasandy ıntellektti tıimdi paıdalaný bolashaq dárigerlerdiń kásibı básekege qabilettiligin arttyratyny anyq.
Prezıdent aıtqandaı, búgingi basty mindet – jalǵan jetistikter men formaldy kórsetkishterge emes, naqty nátıje men sapaly ózgeristerge umtylý. Ońtústik Qazaqstan medısına akademııasy osy baǵytty berik ustanyp, el bolashaǵy úshin jaýapkershiligi joǵary, kásibı bilikti, rýhanı kemel, otanshyl mamandardy daıarlaýdy basty maqsat sanaıdy. Memleket basshysynyń bul bastamalary men oı-tujyrymdary biz úshin naqty áreketke bastaıtyn mańyzdy baǵdar.
Janna SEIITJANOVA,
Ońtústik Qazaqstan medısına akademııasynyń rektory.