Bıyl ońtústikqazaqstandyq mektep bitirýshiler bilim deńgeıi jaǵynan birshama ilgeriledi. Salystyrmaly túrde aıtar bolsaq, 2014 jyly ulttyq biryńǵaı test tapsyrýdan oblystyń ortasha baly 74,5 paıyz bolsa, bıylǵy synaqta 78,7 paıyzǵa jetken. «Altyn belgige» úmitkerlerdiń 2014 jyly 38,5 paıyzy ǵana óz bilimin rastaı alsa, bıylǵy úmitker 1084 oqýshynyń 56 paıyzy dáleldegen. Naqty tarazylap aıtar bolsaq, sońǵy tórt jyldyń qorytyndysy boıynsha oblystyń orta baly 11,8 upaıǵa joǵarylap, «Altyn belgi» sany 369 oqýshyǵa artqan.
Osyndaı jaqsy kórsetkishterge baılanysty Bilim jáne ǵylym mınıstri A.Sárinjipov respýblıka boıynsha UBT-ny joǵary deńgeıde uıymdastyryp, ótkizgeni ári joǵary kórsetkishke ıe bolǵany úshin oblys ákimi A.Myrzahmetov pen óńirdegi pedagogtarǵa Alǵys hat joldady.
«Ońtústik» aqparat ortalyǵynda ótken brıfıngte oblystyq bilim, jastar saıasaty jáne tilderdi damytý basqarmasynyń basshysy Albına Elshıeva túrli pozısııalar boıynsha synaq nátıjelerin jiliktep berdi.
Albına Balǵabaıqyzynyń aıtqanyndaı, jyl saıyn óz kúshine senip UBT tapsyrýǵa talpynatyndardyń qatary kóbeıip keledi. Máselen, ótken jyly 68,8 paıyz oqýshy ǵana synaq tapsyrýǵa bel baılasa, bıyl olardyń qatary 71 paıyzǵa artqan. Buǵan qosymsha 96 oqýshy halyqaralyq olımpıada jáne ǵylymı jobalar jarystarynyń jeńimpazy retinde UBT tapsyrýdan bosatylǵan.
Erekshe atap aıtatyn jaıt, Maqtaaral aýdanyndaǵy B.Momyshuly mektep-gımnazııasy – 35, Túrkistan qalasyndaǵy daryndy balalarǵa arnalǵan mektep-ınternaty – 26 «Altyn belgi» aldy. Jalpy aýdan, qalalardyń kórsetkishteri ótken jyldarmen salystyrǵanda joǵary bolǵanymen Saıram aýdany 1,9 balǵa tómendep otyr. Joǵary kórsetkish Kentaý (99,1), Sozaq (86), Túrkistan (85) qala, aýdandary bolsa, Saıram (67,1), Saryaǵash (70,4) aýdandary tómen nátıjede qaldy. Túlkibas aýdanyndaǵy oblystyq daryndy balalarǵa arnalǵan mektep-ınternatty bitirýshi Laýra Abdazımova 125 ball alyp, respýblıkada eń joǵary deńgeıden kórindi. Byltyr 124 baldy birde-bir oqýshy ala-almaǵan bolsa bıyl 5 oqýshy osy kórsetkishke jetti. 123 baldy 22 oqýshy jınady.
– Elbasy jastarymyzdyń bilimdi bolýyna erekshe mán berip, barlyq jaǵdaıdy jasap otyr, – deıdi Albına Elshıeva. – О́ıtkeni, bilimdi urpaq – Qazaqstannyń kemel keleshegi. Memleket basshysynyń talabyn oblys ákimi Asqar Myrzahmetov pedagogtarymyzǵa árdaıym túsindirip, bilim salasyndaǵy jańa kókjıekke shyǵýǵa yntalandyryp otyrady. Sondyqtan, bul – bizdiń ortaq jeńisimiz.
Baqtııar TAIJAN,
«Egemen Qazaqstan».
ShYMKENT.