Parlament Senaty Áleýmettik-mádenı damý jáne ǵylym komıteti Aqtaý qalasynda kóshpeli otyrys ótkizdi. Otyrys barysynda elimizdiń Jańa Ekonomıkalyq Saıasatyn iske asyrý aıasynda Mańǵystaý oblysynda bıznestiń áleýmettik jaýaptylyǵyn damytý men ony jetildirý sharalary jáne ony quqyqtyq turǵyda qamtamasyz etý máseleleri talqylandy.
Otyrysty asha kelip, komıtet tóraǵasy Aqan Bıjanov qazirgi kezde bıznes pen kásipkerliktiń qoǵamdaǵy róli tek materıaldyq qundylyqtar jasaý jáne kiris alýmen shektelmeıtinin atap ótti. Bıznes ókilderi jańa jumys oryndaryn ashýǵa, eńbek jaǵdaıyn jaqsartýǵa jáne aımaqtardaǵy áleýmettik-mádenı máselelerdi sheshýge qatysýǵa áleýmettik mindetterdi alyp otyr. «Eger de bıznes órkenıetti bolsa, onda memlekettiń áleýmettik ómirdegi yntymaqtastyq aıasy da aýqymdy bolady», – dedi senator. Bul úderis bıznestiń áleýmettik jaýaptylyǵy jónindegi Jezqazǵandaǵy respýblıkalyq forýmda qoǵamdy damytýdyń aýqymdy mindetterin sheshýdegi Memleket basshysy belgilegen kásipkerliktiń sapalyq turǵydaǵy jańa mejesinen bastaý alǵany atap ótildi. Mańǵystaý oblysynyń ákimi A.Aıdarbaev kezdesýge qatysýshylardy halyqty jumyspen qamtý, shaǵyn jáne orta bıznesti damytý, sondaı-aq, aımaqtaǵy áleýmettik-ekonomıkalyq órkendeý máseleleri boıynsha atqarylǵan jumystar týraly habardar etti. Mańǵystaý oblysynyń aýmaǵynda jumys isteıtin jer qoınaýyn paıdalanýshy kompanııalar aımaqty áleýmettik-ekonomıkalyq damytýǵa baǵyttalǵan strategııalyq josparlardy iske asyrýǵa belsendi qatysyp kele jatqany, kelisimshart mindettemeleri aıasynda áleýmettik ınfraqurylym jobalaryn iske asyrýǵa qarjy bólý, aımaqtaǵy bıznestiń korporatıvtik jaýapkershiligin damytý jáne osy salada týyndaǵan ózekti máseleler týraly Mańǵystaý oblysy ákiminiń orynbasary Sh.Ilmuhambetova egjeı-tegjeıli baıandady. Senator S.Bekturǵanov áleýmettik áriptestik pen bıznesti damytý salasyndaǵy depýtattardyń zań shyǵarý qyzmeti týraly áńgimeledi. Sondaı-aq, Densaýlyq saqtaý jáne áleýmettik damý mınıstriniń orynbasary D.Arǵyndyqov, Mańǵystaý oblysyndaǵy Kásipkerler palatasy dırektorynyń orynbasary G. Qalamqalı, «Volna» AKF JShS dırektory N.Karas, «Mańǵystaýmunaıgaz» AQ bas dırektorynyń orynbasary J.Tóleǵojaev jáne bıznes qaýymdastyqtary men jurtshylyq ókilderi sóz sóıledi. Kóshpeli otyrys barysynda senatorlar «CASPI BITUM» BK JShS, «Kaspıı» tushytý zaýyty» JShS, «Kazakh Osseter» ǴО́K» JShS sekildi birqatar kásiporyndarda boldy jáne Qazaq-túrik lıseıindegi oqý úderisterimen tanysty, dep habarlady Parlament Senatynyń baspasóz qyzmeti.