Elbasynyń tapsyrmasyn oryndaý keń aýqym alýda. Bul jóninde keshe Ortalyq kommýnıkasııalar qyzmetinde ótken arnaıy brıfıng barysynda málimdegen «Báıterek» holdınginiń basshysy Qýandyq Bıshimbaev jyl basynan beri aımaqtarda eki myńǵa tarta baspana tapsyryla bastaǵanyn jetkizdi.
Holdıng basshysynyń sózinen belgili bolǵandaı, ústimizdegi jyly «Báıterek» ulttyq holdıngi 487 myń sharshy metr nemese 9740 páterdi paıdalanýǵa bermek. Bul rette olardyń 50 paıyzy (4870 páter) jas otbasylaryna tabystalary erekshe ataldy. Buǵan deıin ústimizdegi jyldyń naýryz aıynda jalpy aýdany 76,5 myń sharshy metr bolatyn alǵashqy 1357 páter holdıng tarapynan Astana, Almaty, Qostanaı, Kókshetaý jáne Semeı qalalarynda satyp alynyp, turǵyndarǵa úlestirilgeni de nazardan tys qalǵan joq. Al sáýirde Shymkent qalasynda «Qazaqstan Ipotekalyq Kompanııa» IU» AQ-pen salynǵan turǵyn úı kesheninde jalpy aýdany 56,2 myń sharshy metrdi quraıtyn 1080 páter bólý bastalǵan.
Q.Bıshimbaev páter alýshylar qatarynda bıýdjettik uıymdar, áskerı jáne memlekettik qyzmetkerler, tolyq emes jáne kópbalaly otbasylar, múgedek bala tárbıelep otyrǵandar, jetim balalar men oralmandar da bar ekendigin ortaǵa saldy. Onyń aıtýynsha, páterler turýshylarǵa daıyn kúıinde usynylǵan. Sondaı-aq, holdıng basshysy kesheden bastap jalǵa beriletin turǵyn úıdiń alańy 306,5 myń sharshy metr bolatyn 5416 páter qurylysy men satyp alý sharty jasalǵandyǵyna nazar aýdartty. Ústimizdegi jyly Astana, Almaty, Semeı, Qostanaı, Pavlodar, Aqtóbe, Shymkent, Kókshetaý, Taraz, Qyzylorda jáne Taldyqorǵan qalalarynda jalpy alańy 262,5 myń sharshy metrlik 4596 páter paıdalanýǵa berilmek. Al 2016 jyly Qyzylorda men Shymkent qalalarynda jalpy alańy 44 myń sharshy metrlik 820 páter qoldanysqa engiziledi.
Tarqatyp aıtqanda, birinshi jartyjyldyq sońyna taman Aqtóbe (77 páter), Pavlodar (35 páter), Almaty (50 páter), Astana (52 páter) qalalarynda jáne Almaty oblysynda (55 páter) kezekte turǵandar arasynda turǵyn úıdi bólý josparlanýda. Holdıng basshysy baǵdarlamany iske asyrýdaǵy bes jyldyń ishinde 1,483 myń sharshy metr nemese 29 myń páter jalǵa berýge usynylatyn erekshe atap ketti. Qurylystyń barlyq kezeńinde táýelsiz qarjy-tehnıkalyq baqylaý qyzmeti tartylatyn bolady. Budan basqa, Ulttyq qordan nysanaly bólingen qarjyny tıimdi jumsaý barysyn Memlekettik komıssııa músheleri, Parlament Májilisindegi «Nur Otan» partııasy fraksııasyna táýeldi baǵdarlamany iske asyrý jáne bıýdjettik qarajattardy jumsaýdy baqylaý boıynsha arnaıy komıssııa músheleri baqylaý júrgizedi.
Jalpy, jeńildik talaptarymen áleýmettik jalǵa beriletin turǵyn úıdi berýge Ulttyq qordan 180 mıllıard teńge bólinse, onyń ishinde «Báıterek» holdıngine jalǵa beriletin turǵyn úıdi salý jáne satyp alý úshin 145 mıllıard teńge, al 35 mıllıard teńge jergilikti atqarýshy organdar úshin bólineri belgili bolyp otyr. Bul qarjylar negizinen ınjenerlik-kommýnıkasııalyq ınfraqurylymdardy júrgizýge baǵyttalady. Qarjynyń bólinisin aıtqanda, 2015 jyly 92,5 mıllıard teńge bólý qarastyrylsa, 2016 jyly 52,6 mıllıard teńge bólý kózdelip otyr eken. Birtindep, satyp alý quny týraly da málimet bere ketken jón. Mysaly, bir bólmeli 33 sharshy metr bolatyn páterdiń aı saıynǵy tólemi 34 myń teńgeni quraıdy. Al jalpy alańy 45 sharshy metr bolatyn eki bólmeli páterdiń quny 46 myń teńge bolsa, ortasha 62 sharshy metrdi quraıtyn úsh bólmeli páterdi jaldaý tólemi 63 myń teńge. Satyp alynbaıtyn, biraq jalǵa beriletin bir bólmeli páterdiń 20 sharshy metri aı saıynǵy tólemi elimizde 10 myń teńgeni quraıdy. Jalpy alańy 30 sharshy metr bolatyn eki bólmeli páter quny ortasha eseppen 15 myń teńge bolsa, alańy 45 sharshy metr bolatyn úsh bólmeli páter quny ortasha eseppen 23 myń teńgeni quraıdy.
Asqar TURAPBAIULY, «Egemen Qazaqstan».