Memleket basshysy Qasym-Jomart Toqaev memlekettik satyp alý júıesin jańǵyrtý mindetin qoıdy. Osy tapsyrma sheńberinde ótken jylǵy qańtardan bastap kúshine engen «Memlekettik satyp alý týraly» zań qabyldandy.
Qarjy vıse-mınıstri Dáýren Keńbeıil atalǵan zańǵa qatysty qabyldanǵan sharalar naryq qatysýshylaryna da, jalpy júıe úshin de aıtarlyqtaı nátıje kórsete bastaǵanyn aıtty.
«Bul zań satyp alý rásimderin jedeldetý, satyp alynatyn taýarlardyń, jumystar men kórsetiletin qyzmetterdiń sapasyn arttyrý, sondaı-aq satyp alý úderisterin odan ári avtomattandyrý baǵytynda mańyzdy betburys boldy», degen ol, reformanyń basty elementi – reıtıngtik-baldyq júıe qoldanylatyn konkýrstyq rásim, onda sheshimder adam qatysýynsyz, avtomatty túrde, JI elementterin paıdalaný arqyly qabyldanatynyn aıtty.
«Qorytyndy bes kúnnen keıin shyǵarylady. Reıtıngtik-baldyq júıeniń negizgi krıterııleri jumys tájirıbesi, kompanııanyń qarjylyq turaqtylyq kórsetkishi, belgili bir ákimshilik-aýmaqtyq birlikke tıesiligi men t.b. Salystyra aıtsaq, bul zań qabyldanǵanǵa deıin konkýrstyq rásimder keminde 60 kúnge sozylsa, reıtıngtik-baldyq júıe engizilgennen keıin bul rásimder orta eseppen 5 kúnde aıaqtalady. Reıtıngtik-baldyq júıe qoldanylmaǵan jaǵdaıda, ádettegi konkýrstar 10 jumys kúnine deıin sozylady», dedi D.Keńbeıil.
Osylaısha, vıse-mınıstr atap ótkendeı, jańa zań birqatar bıýrokratııalyq rásimderdi joıýǵa, satyp alýlardy jeńildetýge ári merzimderdi edáýir qysqartýǵa múmkindik bergen. Buǵan qosa reforma otandyq taýar óndirýshilerdi qoldaýǵa baǵyttaldy. Zańda otandyq kompanııalardy qamtamasyz etýdiń barlyq túrinen bosatý, aıyppul sanksııalaryn azaıtý, taýar jetkizýdiń eń mınımaldy merzimin 15 kúnnen 60 kúntizbelik kúnge deıin uzartý, sondaı-aq tólem merzimin 30 jumys kúninen 10 jumys kúnine deıin qysqartý qarastyrylǵan.
Memlekettik satyp alý týraly jańa zań otandyq kompanııalarǵa mańyzdy preferensııalardy bekitti. Sonyń arqasynda otandyq óndirýshilerge kelisimsharttar jasasý kezinde basymdyq berý quqyǵy, shart somasynyń 50% kóleminde mindetti avans tóleý, sondaı-aq banktik kepildikter usynýdan bosatý men aıyppul sanksııalary jóninde jeńildetilgen talaptar qarastyrylǵan.
«Bul sharalar otandyq taýar óndirýshilerdi qoldaýǵa, sondaı-aq otandyq óndiristi yntalandyrýǵa baǵyttalǵan. Atalǵan sharalar ótken jyldyń qorytyndysy boıynsha otandyq óndirýshilermen jasalǵan kelisimsharttar sanyn edáýir arttyrýǵa ári otandyq óndirýshilermen jasalǵan kelisimsharttyń jalpy somasyn ulǵaıtýǵa múmkindik berdi», dep túsindirdi vıse-mınıstr.
Qarjy mınıstrliginiń derekterine sáıkes, byltyr otandyq taýar óndirýshilermen jasalǵan kelisimsharttardyń jalpy somasy 2024 jylmen salystyrǵanda 23%-ǵa ósip, 460 mlrd teńgege jetken. Mundaı ósim maqsatty memlekettik qoldaýdyń jergilikti ónimge degen suranysyn yntalandyryp, otandyq kompanııalarǵa tapsyrys kólemin tikeleı arttyryp otyrǵanyn aıqyn kórsetedi.
«Reforma memlekettik satyp alý salasyndaǵy adal emes qatysýshylarǵa qosarlanǵan tosqaýyl qalyptastyrdy. Bir jaǵynan, jalǵan málimet usyný múmkindigi kúrdelene tústi, ekinshi jaǵynan, buǵan deıin zańbuzýshylyqqa jol bergen tulǵalarǵa turaqty qarjylyq jaýapkershilik engizildi. Osylaısha, memlekettik satyp alýǵa jaýapty qatysý mádenıeti qalyptasyp, onda iskerlik bedel men adaldyq memlekettik satyp alýǵa qatysýdyń negizgi faktoryna aınalyp jatyr», dedi D.Keńbeıil.
Senimdi arttyrý maqsatynda memlekettik satyp alýǵa qoǵamdyq monıtorıng engizilip, barlyq rásim jańa Biryńǵaı satyp alý platformasyna shoǵyrlandyryldy. Shaǵymdaný tártibi jeńildetildi, osy rette shaǵym berý satyp alý úderisin toqtatpaıdy. Bul sharalar shaǵymdardyń jalpy sanyn 23%-ǵa qysqartýǵa múmkindik berdi. Memlekettik satyp alýlar júıesin jetildirý jumysy jalǵasyp jatyr.