«Nur Suńqardyń» jeńimpazdary anyqtaldy

Keshe Baılanys jáne aqparat qyzmetkerleri kúni qarsańynda elordada «Astana Music Hall» meıramhanasynda jyl saıynǵy dástúrli «Nur Suńqar» respýblıkalyq baıqaýynyń jeńimpazdaryn marapattaý saltanaty ótti. Atalǵan sharany «Nur Otan» partııasy men Investısııalar jáne damý mınıstrligi uıymdastyrdy. Sharanyń ashylý saltanatyn­da «Nur Otan» partııasy Tóra­ǵasynyń birinshi orynba­sary Baýyrjan Baıbek BAQ ókilderin kásibı merekelerimen quttyqtap, olardyń memlekettiń strategııalyq josparlaryn iske asyrýdaǵy rólin atap ótti. «Qazaqstanda memlekettiń tu­raq­ty damýynyń, baıandy ekono­mıkalyq ósýdiń, Elbasynyń dana saıa­satynyń arqasynda búgin­­gi zamanaýı, tehnıkalyq jabdyq­talǵan, básekege qabiletti medııa­lyq keńistik qalyptasty jáne bizdiń memleketimizdiń maqsaty bıik josparlaryn iske asyrý tek BAQ-tyń belsendi qatysýymen ǵana múmkin. «Nur Otan» partııasy búgin de, erteń de Qazaqstandaǵy aqparattyq salanyń damýyn yntalandyrýǵa, jýrnalıstiń kásibı jáne tulǵalyq ósýi úshin jaǵdaı týǵyzýǵa nıetti», dep atap ótti B.Baıbek. Bıylǵy jyly «Nur Suń­qar» baıqaýyna qatysýǵa respýb­lıkalyq jáne óńirlik BAQ-tardan 220 ótinish tústi, olardyń ishinde 132 jumys aldyn ala irikteýden ótti. Kelip túsken materıaldardyń 65 paıyzy qazaq tilinde bolǵanyn jáne úshten ekisin óńirlik jýrnalısterdiń usynǵanyn atap ótken lázim. Baıqaý komıssııasy «2050» Strategııasyn, «Nurly Jol» baǵdarlamasyn, Bes halyqtyq reformany, «Memlekettik qury­lystyń 100 qadamyn» iske asyrýdy kórsetken, táýelsizdik, bir­lik pen keli­simdi nasıhattaǵan, son­daı-aq, partııa qyzmeti týraly materıaldardy qabyldady. Bıylǵy jyly tuńǵysh ret eki jańa atalym qosyldy – «Qoǵam úni» – eń úzdik radıojýrnalıst jáne «Sybaılas jemqorlyqqa qarsy taqyryptaǵy eń úzdik materıaldar úshin» atalymy. Syılyqtar 9 atalym boıynsha berildi. «Sóz sheberi» – eń úzdik gazet jýr­­nalısi atalymyn – Iýlııa Ma­­ger, «Kazahstanskaıa prav­da» gazetiniń sholýshysy; «Erekshe pikir» – eń úzdik televızııalyq jýrnalıst atalymyn Erkin Muhamedjanov, «Qazaqstan» telearnasy «Apta. kz» telebaǵdarlamasynyń jetek­shisi; «Qoǵam úni» – eń úzdik radıo atalymyn – Qazaq radıosy «Qaıyrly tań, Qazaq eli» baǵdarlamasynyń bas redaktory Quralaı Jumahanova men «Orda FM radıosynyń dırektory Azamat Isaev jeńip aldy. «Medıa – profı» – eń úzdik aqparattyq agenttik jýrnalısi atalymyn – Balajan Serǵalı, «Bag kz» aqparattyq portalynyń bas redaktory; «Aı­maq aınasy» – eń úzdik óńirlik til­shi atalymyn – «Munaıly Astana» (Atyraý oblysy) gazetiniń bas redaktory Quttygereı Smadııar men «Nash Kostanaı» gazetiniń tilshisi Aleksandr Kýzmıchev ıelendi. «Kózqaras» atalymyn – eń úzdik bloger – Tımýr Kýbekov; «Sybaılas jemqorlyqqa qarsy taqyryptaǵy eń úzdik materıaldar úshin»» atalymyn – Gúlbaný Aıýpova, 31 telearnasy «Informbıýro» aqparattyq qyzmeti astanalyq fılıalynyń shef-redaktory; «Qazaqstandyq jýrnalıstıkaǵa qosqan úlesi úshin» atalymyn – Aıdos Úkibaev, «Habar» agenttigi AQ basqarmasynyń tóraǵasy; «Partııa qyzmeti týraly eń úzdik materıal úshin» atalymyn – Irına Iаkýnına, Shyǵys Qazaqstan oblysy boıynsha «Astana» telear­nasynyń menshikti tilshisi ıelendi. Ár atalym boıynsha 1 mln. teńge kóleminde aqshalaı syılyq berildi. «Nur Suńqar-2015» syılyǵynyń demeýshisi «Sesna Bank» AQ boldy. Sondaı-aq, saltanatty rásimde Investısııalar jáne damý mınıs­trliginiń atynan «Aqparat sala­synyń úzdigi» tósbelgilerin tabys etý saltanatynyń rásimi ótti. Qurmetti belginiń 8 ıeger­leriniń ishinde «Egemen Qazaqstan» gazetiniń Atyraý oblysyndaǵy menshikti tilshisi Shópeǵul Joldasbek áriptesimiz bar. Raýshan TÁÝIRHANQYZY, jýrnalıst. Sýretti túsirgen Erlan OMAROV.