Keshe Úkimet úıinde Premer-Mınıstrdiń birinshi orynbasary Baqytjan Saǵyntaev Astanaǵa jumys saparymen kelgen Qytaı kommýnıstik partııasynyń OK Saıası bıýrosy Turaqty komıtetiniń múshesi, QHR Memlekettik keńesiniń Vıse-premeri Chjan Gaolımen kezdesip, kelissóz júrgizdi.
«Qytaı qashanda bizdiń syrtqy saıasatymyzdaǵy eń mańyzdy basymdyqtarymyzdyń biri bolyp keldi jáne bola bermek. Eki el arasyndaǵy ózara qatynas jańa deńgeıge kóterilip, jan-jaqty strategııalyq sıpatqa ıe boldy. Bizdiń ortaq jetistigimizdiń kepili joǵary deńgeıdegi saıası dıalog boldy», dep atap ótti B.Saǵyntaev kezdesý barysynda.
Premer-Mınıstrdiń birinshi orynbasarynyń aıtýynsha, Qazaqstan Prezıdenti Nursultan Nazarbaevtyń «Nurly Jol» Jańa Ekonomıkalyq Saıasaty men QHR Tóraǵasy Sı Szınpınniń «Bir beldeý, bir jol» bastamasy birin biri úılesimdi tolyqtyryp, eki eldiń ózara tıimdi áriptestigine jańa perspektıvalar ashady.
Kelissózder barysynda taraptar ekijaqty yntymaqtastyq máselesin talqylady. Atap aıtqanda, óndiristik qýattardy QHR-dan Qazaqstanǵa kóshirý, aýqymdy kólik jobalary aıasyndaǵy is-qımyl, transshekaralyq sý resýrstaryn paıdalaný, energetıka, aýyl sharýashylyǵy salalaryndaǵy yntymaqtastyq, sondaı-aq, Qytaıǵa dástúrli qazaqstandyq ónimder eksportyn (mys, ferrohrom, temir kendi túıirshikter, bolat prokaty jáne t.b.) ulǵaıtý máseleleri qaraldy.
Qytaıdyń shyǵys jáne ońtústik-shyǵys provınsııalarynyń joǵary ekonomıkalyq jáne ınvestısııalyq áleýetin, sondaı-aq, ShUAR-diń ekonomıkalyq mańyzdylyǵy artyp kele jatqanyn eskere otyryp, Qazaqstan QR men QHR О́ńiraralyq yntymaqtastyq forýmyn qurýdy usynady.
B.Saǵyntaev pen Ch.Gaolı mádenı-gýmanıtarlyq salada, stýdenttermen jáne taǵylymdamadan ótýshilermen almasýda eki el arasyndaǵy yntymaqtastyq nyǵaıa túskenine toqtaldy. Qazirgi tańda Qytaıdyń joǵary oqý oryndarynda 12 myńǵa jýyq qazaqstandyq stýdentter men oqýshylar bilim alýda. 2015-2016 oqý jylyna qytaılyq tarap qazaqstandyqtarǵa arnap 59 grant bólip otyr. Qazaqstan otandyq JOO-larda bilim alý úshin 83 grant bóldi.