Qansha qurmet kórsetsek te qaryzymyz ótelmes

Darıǵa Nazarbaeva «Astana Opera» teatry ujymymen birge ardagerlerge qaıyrymdylyq konsertin uıymdastyrdy Uly Jeńistiń 70 jyldyǵyna jetken aıaýly ardagerlerge bıyl kórsetilip jatqan qurmet pen qoshemettiń bar túri de jarasymdy bolyp tur. О́z kezeginde aq samaıly ardagerlerimizge «Astana Opera» teatrynyń orkestri men hory Darıǵa Nazarbaevamen birge erekshe konsertti syıǵa tartty. Ol konserttiń televızııalyq nusqasyn «Habar» arnasy kórermen nazaryna usyndy.

Qalaı desek te, has talanttar men qasirettti taǵdyrlar týdyrǵan maıdan áýenderi Darıǵa Nazarbaevanyń júregine erek jaqyn ekenin bile­miz. Eger eldiń esinde bolsa, Darı­ǵa Na­zar­baevanyń eń alǵashqy jeke konserti de 2001 jyly Uly Jeńis­tiń qurmetine arnalǵan bolatyn. Shyn­dyǵynda da talantty, daryndy jan jyl saıyn osy úrdisti jalǵastyryp, óziniń erekshe qurmet tutatyn tyń­dar­mandaryna qaıyrymdylyq kon­sertterin ótkizip turýdy dástúrge aınaldyrdy. Odan túsken qarajat ta Uly Otan soǵysy ardagerleriniń qoryna túsip otyrady.

«Uly Jeńiske arnaý...» atty kon­serttiń árbir áni ǵasyr týdyrǵan áýen­derden quralyp, tyńdaýshylaryn sheksiz emosııaǵa shomyldyryp, kózderge búginge táýbe aıtqan qýanysh pen keshe­gimizge salaýat aıtqan saǵynyshtyń jasyn úıirdi. Maıdan melodııalary olardy birde mahabbat pen soǵys surapyly arpalysqan jastyq shaqqa saıahat shekkizip, birde qan­dykóılek joldastarymen qaýysh­tyryp, birde osy kúnge jetkizgen jazmyshtyń qýanyshyna bóledi. Konsertti Darıǵa Nazarbaeva «Ana týraly ballada» ánimen ashty. Sózin aqyn A.Shamkenov jazyp, ánin sazger J.Seıilov shyǵarǵan týyndyny messo-soprano daýysty daryn ıesi ádemi oryndap, óziniń aǵa býynǵa degen sheksiz de shynaıy alǵysyn bildirdi. Osylaısha tarıhqa taǵzym etti, bir sát bolsa da aıaýly ardager­leri­mizge erekshe kóńil-kúı syılady. Omyraýlary ordenge, keýdeleri qazynaly estelikterge toly batagóı qarııa­la­rymyz talantty qyzdaryna rııasyz qol soqty. Máńgilik aıtyla beretin, eshqashan eskirmeıtin maıdan ánderi, Otanǵa degen shynaıy súıispenshilikten týǵan shyǵarmalardyń barlyǵy da ólmeı­tin naǵyz mahabbattyń qudi­­­­re­timen sýarylǵan. Sondyqtan da has talanttar týdyrǵan konserttik baǵdar­lamanyń talǵampaz repertýary tyńdaý­shy­larynyń da kóńilinen shyqty. О́ıt­keni, osynaý konsertte árbir ánniń óz taǵdyry bolsa, oryndaýshylary da ony júregimen jetkizdi. Búkil bir dáýirdiń qýanyshy men qasireti almasqan dramasy ánniń tilimen ardagerlerge tartý etildi. Ásirese, ardagerlerge «Qaıyqta», «Ánim sen ediń» jáne «Aýylym» men qulaqqa jyly tıetin «Sınıı platochek», «Jdı menıa», «V gorodskom sadý», «Smýglıanka», «Staryı park», «Starınnyı vals», «Vals o valse», «Pesnı ızdaleka» sııaqty úlken oryndaýshylyq sheberlikti talap etetin tamasha ánder aǵa býynǵa esten ketpes úlken áser syılady. Konsert ádemi esteliktermen órilip otyryldy. Konsertke «Astana Opera» teat­rynyń mýzykalyq jetekshisi, Qazaqstannyń eńbek sińirgen qaırat­keri Abzal Muhıtdınov dırıjerlik etip, sahnalyq qoıylymdardy Qor­ǵanys mınıstrliginiń Ortalyq ansam­bliniń mýzykanttary men bıshileri kórkemdedi. Áıgili pıanıst Tımýr Ýrmancheev «Qaratorǵaı» arqyly mýzykalyq sheberligin pash etti. Onyń ústine búginde saltanaty ke­lisken «Astana Opera» zaly men teatr­­dyń aıtýly solısteri konsert­tiń sal­maǵyn asyrdy. Darıǵa Nazarbaeva zamana áýenderi shyrqalyp júrgen ári memleketimizdiń de maqta­nyshy bolyp tabylatyn osynaý bekzat sahnanyń sańlaqtary – Medet Shotabaev, Meıir Baınesh, Andreı Tregýbenko, Azamat Jyl­tyrkózov, Igor Blagodarnyı syndy naǵyz talanttarmen bir deń­geı­de shyrqap, ardagerlerimizdiń qoshe­me­tine de bólendi, batasyn da aldy.

Aınash ESALI, «Egemen Qazaqstan».

 ASTANA.