Tatardy tań qaldyrǵan teatr

Jaz mezgili túrkitildes teatrlar úshin tabysty bas­taldy. Jaqynda Qazan qalasy teatr festıvaline qatysýshy qonaqtardy qarsy alyp, sahna synynyń HII maýsymdaǵy shymyldyǵyn túrdi. Túrkitildes alty memleket jáne Reseıdiń birneshe aımaǵynan at aryltyp jetken óner kóshi tatar eliniń tórinde bas qosty. Qazaqstan, Túrkııa, Ázerbaıjan, Qyrǵyzstan memleketteriniń jáne Altaı Respýblıkasy, Iаký­tııa, Bash­qurtstan, Ta­tar­stan avto­no­mııa­larynyń teatr tynysymen tanystyrýshy ujym ókilderi ónerin Qazan jurtshylyǵyna tartý etti. О́nertaný ǵylymdarynyń ­doktory, professor, belgili shekspırtanýshy maman Alekseı Bartoshevıch (Máskeý) tóraǵalyq etken óner synynda Bashqurtstan Respýblıkasynyń eńbek sińirgen qaıratkeri, teatr synshysy Dına Davletshına (Ýfa), ónertaný kandıdaty, professor Sánııa Qabdıeva (Almaty), Halyqaralyq «Naýryz» festıvali kórkemdik jetekshisiniń orynbasary, «Zolotaıa maska» Búkilreseılik festıvali sarapshylar keńesiniń múshesi, teatr synshysy Nııaz Iglamov, Ekaterınbýrg mýnısıpaldyq jas kórermender teatry dırektorynyń orynbasary Oleg Loevskıı (Ekaterınbýrg), teatrtanýshylar Elena Kovalskaıa (Máskeý), Krıstına Motıvenko (Máskeý), Nadejda Stoeva (Sankt-Peterbýrg) sııaqty bir top reseılik sahna mamandary túrkitildes teatrlarmen qatar, qazaq teatrlarynyń búgingi aıaq alysy men kásibı qarymyna baǵa berip, festıval baǵdarlamasyna engen qoıylymdardyń kórkemdik deńgeıin talqyǵa saldy. Bıylǵy «Naýryz», ásirese, qazaq teatrlary úshin erekshe jańalyqqa toly boldy: HII teatr maýsymy tolyǵymen qazaq óneriniń ereksheligin ekshep, nasıhattaýǵa arnaldy. Elimizdiń atynan qatysqan úsh birdeı trýppa: M.Áýezov atyndaǵy memlekettik akademııalyq qazaq drama teatry (Almaty), N.Jantórın atyndaǵy Mańǵystaý oblystyq mýzykalyq drama teatry (Aqtaý) jáne Astana qalasy ákimdiginiń «Jastar teatry» ujymy ónerine tatar jurtshylyǵy tánti bolyp, reseılik synshylar bas ıdi. Ásirese, Astana qalasy ákimdiginiń Jastar teatry sahnalaǵan Ý.Sheks­pırdiń «Asaýǵa – tusaý» komedııasy (qoıýshy-rejısseri Qazaqstannyń eńbek sińirgen qaıratkeri Nur­qanat Jaqypbaı) jastyq jalyny, plastıkalyq tapqyr sheshimi arqyly, qoıylymnyń qýatty dınamıkasymen festıval jańa­lyǵyna aınaldy. «Asaýǵa – tusaý» – Jastar teatry ujymynyń tutastaı trýppa bolyp qatysar hám ujym óneriniń bar múmkindigi men ereksheligin pash eter birden-bir qoıylym. Ulttyq qundylyqtarymyz ben búgingi qazaq teatrynyń tynys-tanymy, deńgeı-talǵamymen tanystyrý jaýapkershiligin arqalap jetken elordalyq Jastar teatry Qazan qalasynda osylaısha abyroıly óner kórsetip, ulttyq ónerdiń týyn jelbiretip qaıtty. Sóıtip, bes kúnge sozylǵan óner jármeńkesi qazaq teatrlary týraly reseılik kásibı mamandardyń syny men salıqaly saraptamasyna qanyǵyp, túrki álemi teatr­larynyń nemen tynys­tap jatqandyǵyn sezinip-bilýge, taldap-tarazylaýǵa mol múmkindik týǵyzyp berdi. Osy arqyly festıval túrkitildes halyqtardyń tili men diline jańasha tynys ashyp, ulttar arasyndaǵy mádenıet pen dástúr almastyǵyna tyń ser­pin syılady. Bastysy, túrki halyq­taryna ortaq mádenıet merekesinde túbi bir túrki aǵaıyndar qazaq óneriniń qarymdy aıaq alysyna tánti bolyp tarqasty. Nazerke JUMABAI, teatrtanýshy. Astana – Qazan – Astana.