Atyraýda burnaǵy kúni bastalyp, tolassyz jaýǵan jańbyrdyń sońy nóserge ulasty. Tabıǵattyń bul tosyn minezi keshe jurtshylyqty ábden ábigerge saldy. Qaladaǵy keıbir úılerde elektr jaryǵy óship, túske deıin qosylǵan joq. Mektepterdegi sabaq ýaqytynan erte taratyldy. Al qala kósheleri sýǵa tolyp, kólikter júzip júrgendeı áser qaldyrdy.
Tótenshe jaǵdaılar departamenti taratqan málimetke qaraǵanda, 11 mamyrda bastalǵan nóser jaýynmen birge uıytqı soqqan jel jyldamdyǵy 15-20 metr sekýndqa jetken. Nóser jaýynnan jeke sektordaǵy 12 úıge sýǵa ketý qaýip tóngen. Bul derek áli de anyqtalý ústinde. Jınaqtalǵan jańbyr sýyn soryp azaıtýǵa arnaýly kólikter tartylýda. Jeke sektordaǵy 12 úıden 35 adam qaýipsiz jerge kóshirildi.
Joldasbek ShО́PEǴUL,
«Egemen Qazaqstan».
ATYRAÝ.
Sýretti túsirgen Rahym QOILYBAEV.