Qazaqstanda alǵashqy 7 aıda bólshek saýda kólemi 2,9 paıyzǵa ósip, somasy 3 trln. 328 mlrd. teńgege jetti. Ulttyq ekonomıka mınıstrligi statıstıka komıtetiniń habarlaýynsha, osy jyldyń qańtar-shilde aılarynda saýda kásiporyndary arqyly taýarlardy ótkizý kólemi 2014 jyldyń sáıkes merzimimen salystyrǵanda 0,1 paıyzǵa tómendep, 1 trln. 772 mlrd. teńgeni quraǵan.
Qazaqstandyqtar maýsym aıynda tólem kartalary arqyly 22,9 mln. tranzaksııa jasady. Ulttyq banktiń statıstıkalyq málimetterine súıensek, bul ótken jylǵy maýsym aıyndaǵy kórsetkishten 10,2 paıyzǵa kóp. Bir aıda jasalǵan tranzaksııalardyń kólemi 687,4 mlrd. teńge boldy.
Bıyl Astanada jylý qubyrlaryn jańartýǵa 533 mln. 933 myń teńge qarastyrylyp otyr. «Astana-Teplotranzıt» AQ óndiristik qyzmetiniń jetekshisi Májıt Shonaevtyń aıtýynsha, ol jumystar jyl sońyna deıin aıaqtalady. Kompanııa jyl saıyn elordada eki eselengen 13-14 shaqyrym jylý qubyrlaryn almastyryp keledi.
Almaty oblysyndaǵy «Amıran» sút zaýytynda 247 jumys orny ashyldy. Kásiporynda 2015 jyldyń 4 aıy ishinde 315,2 tonna sút óńdelip, 203,8 mln. teńgege 394 tonna ónim óndirildi. Jalpy, óndiris orny jylyna 1 500 tonna balalarǵa arnalǵan sút ónimderin daıyndaýǵa arnalǵan.
Shymkentte tabysy tómen 600-den astam otbasyǵa ataýly áleýmettik kómek kórsetildi. Qala ákimi Darhan Satybaldynyń aıtýyna qaraǵanda, osy maqsatta 19,1 mln. teńge jumsalǵan. Sondaı-aq, 18 jasqa deıingi balalarǵa arnalǵan 447,5 mln. teńge járdemaqy jáne 674 otbasyǵa 22,3 mln. teńge kóleminde turǵyn úı kómegi tólendi.
Qostanaı oblysynda sońǵy bes jylda 4,4 myń aýyl sharýashylyǵy tehnıkalary satyp alyndy. Oblys ákiminiń orynbasary Bazyl Jaqypovtyń málimdeýinshe, oǵan 46 mlrd. teńge jumsalǵan. Bıyldyń ózinde óńirde 206 traktor, 74 kombaın, 40 egis kesheni, 90 tuqym sepkish jáne 220 dana ózge de tehnıka satyp alynǵan.
Batys Qazaqstanda bıyl respýblıkalyq mańyzy bar joldardy kútip-ustaý úshin 600 mln. teńge bólindi. «Qazaqavtojoldyń» batysqazaqstandyq fılıaly dırektorynyń mindetin atqarýshy Baýyrjan Temirhanov mundaı joldyń kólemi óńirde 1 287 shaqyrymdy quraıtynyn jetkizdi.
Habarlar Úkimet, oblystyq ákimdikter saıttary, «QazAqparat» agenttigi jáne «24kz» telearnasynyń derekteri boıynsha daıyndaldy.