Táýekel – erdiń isi

Qaltaev Jánibek – shaǵyn kásipker. Uzyn joldyń boıynda shaǵyn býdkasy bar. Aǵarǵan satady. Qymyz, qymyran, ashyǵan kóje degendeı. Bireýge paıdasy bolmasa zııany joq, óz arbasyn súırep, otbasyn asyrap júrgen azamat. – Memleket basshysy Nur­sultan Nazarbaevtyń Ún­deýin gazetten oqydym, teledıdardan kórdim, – deıdi Jánibek Shekeruly. – Bul – óte mańyzdy oqıǵa. Meniń baıqaýymsha, jurttyń kóbi selt ete qoıǵan joq sııaqty. Oryndalǵan, or­yndalmaǵan reforma­lar bar, sonyń birindeı qabyl­daı ma, qaıdam. – Al, óziń she? Dúnıejúzilik saýda uıymyna kiretin boldyq. Ne ózgeris kútesiń? – Endi bizdiń shaǵyn bıznes­ke onshalyqty yqpaly joq-aý deımin. Germanııada bir nemis úıir-úıir jylqy ustap qymyz sa­tady degendi «Egemennen» oqy­­ǵanmyn. Tipti, sol nemis bıe sútin tereń óńdep opa-dalap jasaı­dy deıdi. Qazaqstanǵa da kelip, bıe saýýdyń, qymyz baptaý­dyń jaıyn úıretip ketken be, áıteýir, ­gazetter bir shýlady ǵoı. Biraq, nemistiń qymyzy biz­diń eldiń qymyzyndaı qaıdan bolsyn. Aspany únemi dym búr­kip turady, shóbi jap-jasyl. Jýsandy dalasy joq. Son­dyq­tan qymyzy jasyq ári bizdiń baǵamen salystyrǵanda qym­bat. Qazaq qymyzyna báseke­les bolady dep oılamaı­myn. Al qymyrannyń bir lıtri Qy­taıda 8 myń teńgege deıin bara­dy degendi estidim. Sondyq­tan, qazaqtyń aǵarǵanyna báseke­les joq. Biraq, elektr taýarlary, qurylys materıaldary, jo­ǵary tehnologııalyq ónim­der Qazaq­stan naryǵynda kóptegen kásip­oryndarymyzdy yǵystyrady. – Elbasy da Úndeýde osy qaýipti aıtty. Sapasy joǵary, baǵasy tómen taýarlardyń bási kúsheıedi. Qazaq kásipkerleri ne isteý kerek dep oılaısyń? – Saıramda «Altyn adam» degen saýda belgisimen kostıým-shalbar tigiledi. Baǵasy kóńilge qonymdy. Jıyrma, qyryq myń teńge aralyǵynda. О́zbekstannan kontrabandalyq jolmen kos­tıým-shalbarlar keledi. Baǵasy kóterme saýdada 10 myń teńge. Ekeýi birdeı sııaqty. Biraq, oılap qarasańyz, 10 myń teńgege qandaı kostıým-shalbar keledi? Tigý qunynyń ózi osyndaı ǵoı. Sapa tómen, materıal arzanqol. Biraq, ekeýiniń de alýshysy bar. Jaqsy kıim kıgisi keletin adam «Altyn adam» fabrıkasyna barady. Muny qaltasy kótere almaıtyndar Qytaı, О́zbekstan, Qyrǵyzstannyń arzan kıimderi kerek. Dúnıejúzilik saýda uıymy arqyly kelgen taýarlarǵa jurt osylaı qaraıtyn bolady. Utylar tusymyz da utarymyz da bar. Biraq, Elbasy osyndaı bolatynyn, básekege shydas berý úshin jańa tehnologııalar qajettiligin únemi aıtyp keldi. Jańa kásiporyndar men aýyl sharýashylyǵyn qoldaý arqyly birshama bıikke kóterip aldyq. Táýekel degen erdiń isi. О́zge memlekettermen terezemiz teń bolýy úshin DSU-ǵa kirý kerek boldy. Endi ne tartynatyny bar. Qıyndyq bolady. Endi qazaq­qa bosbelbeýlik keregi joq. Ákim­diktegiler de halyqqa úlken qoldaý bildirse deımin. Keı­de qala­nyń sánin buzady dep shaǵyn býd­kamyzdy artyp ákete jazdaıdy. Myna Qytaı shaǵyn jáne orta bızneske qol tıgizbeı álemdik naryqqa shyqty ǵoı. Básekelestik – kásipkerdi shıratady. Jańasha jumys jasaýǵa talpyndyrady. Jamanshylyq shaqyryp oıbaılamaǵannyń emes, jaqsylyq oılaǵannyń tasy órge domalaıdy. Ony ómirdiń ózi kórsetip júr. Qazaq kásipkerleri sapasy joǵary, baǵasy kóńilge qonymdy taýarlardy kóptep shyǵarsa, DSU-nyń paıdasyn kóredi. Aldynan úlken naryq álemi ashylady. Bul – úlken múmkindik. Áńgimelesken Baqtııar TAIJAN, «Egemen Qazaqstan». Ońtústik Qazaqstan oblysy.