ASTANA. 25 aqpan. Reseı Federasııasynyń memlekettik dýmasy Volgograd qalasyna burynǵy «Stalıngrad» degen tarıhı ataýyn qaıtyp berýden bas tartty. Bul týraly Lenta.ru habarlady.
Usynysty dýmadaǵy kommýnıstik partııa fraksııasy 12 aqpan kúni bergen bolatyn. Kommýnıster sonymen birge Máskeý qalasyndaǵy ortalyq alańdardyń nemese kóshelerdiń birin Iosıf Stalınniń atymen atap, generalısımýstyń eskertkishin ornatý týraly da usynys engizgen edi.
«Atty aýystyrý tek qana Volgograd oblystyq dýmasynyń quqyǵyna jatady. Al Máskeýdegi kóshe atyn berý men eskertkish ornatýdy Máskeý bıliginiń quzyrly organdarynda», - dep atap kórsetti memlekettik dýmanyń federatıvti qurylymdar jáne jergilikti ózin ózi basqarý máseleleri jónindegi komıteti tóraǵasynyń orynbasary Vıktor Kazakov.
Budan buryn memlekettik dýmanyń profıldi komıeti qaýly jobasyn alyp tastaýdy usynǵan bolatyn.
О́tken jyly prezıdent Vladımır Pýtın Volgogradtyń tarıhı atyn referendým jolymen qaıtarýǵa bolatynyn joqqa shyǵarmaǵan edi. О́ıtkeni, Reseıdiń ekinshi dúnıejúzilik soǵystaǵy ardagerleriniń biri oǵan osyndaı ótinish bildirgen-tin.
2013 jyly Volgograd qalalyq dýmasynyń depýtattary Uly Jeńistiń saltanaty kúnderi «qaharman-qala Stalıngrad» degen ataýdy qoldaný týraly sheshim qabyldady.
Qalanyń negizi 1859 jyly qalanǵanda ol Sarısyn dep atalǵan. 1925 jyly ol Stalıngradqa aınaldy. Sebebi, ataman Petr Krasnovtyń bólimderi qalaǵa shabýyl jasaǵanda, onyń qorǵanysyn Stalın basqarǵan eken. 1961 jyly jeke basqa tabynýmen kúres sheńberinde eldi mekenniń ataýy Volgograd bolyp ózgertildi.
Murat Aıtqoja.